Skrekk-buss og buss-nekt

RYFYLKE: Mindre til hurtigbåt i statsbudsjettet fører til merkelege reaksjonar. I staden for samferdselsstyret kjem Kolombus AS med nye ruter og gjer seg med det til gråsone og samanveksing av privat og offentleg. Eg påstår at det kan ikkje trafikk-entreprenøren gjera. 13. desember gjer Tomas Nesheim stort nummer av at Rogaland fylke eig dette selskapet, men nemner ikkje det som er saka og som står i statuttane: «Kolombus har myndighet til å gjøre mindre justeringer i rutetilbudet. Større forandringer i eksisterende ruter, samt opprettelse og nedleggelse av ruter, må vedtas politisk av fylkestinget.»

Mot instruksen vil aksjeselskapet legga ned hurtigbåtrutene på Sauda, Sand og andre stader for å halda oppe rutene mellom Judaberg og Stavanger, der det er veg og tunnel; og Kolombus vil ikkje setja opp bussrute. Raseringa av ruter er unødvendig. Ved å samkjøra med buss frå og til Judaberg kan alle hurtigbåtrutene haldast oppe.

Eit forferdelig syn

Nesheim går sterkt imot dette. I høgstemt ordelag gjer han hurtigbåt langs tunnel til «livsvegen», og lagar skrekk-bilete av kor faelt det skal vera med buss. Det han skriv, er for så vidt morosamt. For di båt kan ta fleire passasjerar enn ein buss, ser han føre seg lange «buss-kolonner». Eit forferdeleg syn.

Med talmagi skriv han om kor lang tid bussruter skal ta, som ingen kan vita utan å kjenna rutene. Og han vil ikkje høyra på at bussrutene nordanfrå kjører rett inn på motorvegen og er på Forus og i Sandnes like fort eller fortare enn med venting og buss frå Stavanger sentrum. Gjennom Tjensvoll-krysset tek det nokre få minutt frå den siste tunnelen til Ullandhaug.

Juks

Andre stader kan det vera trafikkork, og alt er ikkje best på veg og i tunnel. Finnøy skal difor vera både fastland og ikkje fastland. Det er juks, og då er det ikkje løye lenger. Nokon må snytast og skal ofrast; dei lengre inne som må over fjord, og dei som vert nekta buss. Kva dette er? Det er å ikkje eiga skam i livet.