Frå Hillevåg til Venezia?
KUNST: Pia Myrvold er heime i Stavanger frå Paris i jula. Spørsmålet er om ho kjem seg til Venezia i 2019, samtidig som kunstbiennalen går av stabelen. – To av seks faktorar er på plass, fire gjenstår for at Venezia skal gå i boks, seier Pia Myrvold.
Som vanleg er ho heime i Stavanger i jula. I tillegg til jule- og nyttårsfeiring har ho også ope i lokala ho leiger i Rogalands Avis´tidlegare lokale i Hillevåg, der ho har laga sin eiga juleutstilling. Eigentleg skulle det gamle bygget vore rive for lenge sidan, men enn så lenge heng Myrvolds tidlegare kleskolleksjonane i glasskapa i gangane. Og rundt om i dei tomme romma er det mengdevis av kunst, frå dei store måleria frå 1980-talet til nye trykk av fargerik, digital kunst.
– Dette er både atelier og lager. Eg har atelier i Paris, Stavanger og i Spania - men strengt tatt jobbar eg over heile verda, seier Myrvold.
I løpet av 2018 har ho laga stadspesifikke kunstinstallasjonar i Miami, Seattle, Bergen, Delray Beach i Florida og Nova Gorica i Slovenia. I tillegg heng det for tida ein stor, digital vegginstallasjon på 350 kvadratmeter i Paris.
– I praksis er galleria og institusjonane eg stiller ut på også ateliera mine når eg jobbar med prosjekta mine der. Dessutan jobbar eg jo mykje digitalt, og det kan eg gjera kor som helst.
Sjølvstendig kunstnar Myrvold er sin eigen agent, sin eigen gallerist, si eiga PR-dame, sin eigen økonomiansvarlege.
– Fordi du er så eigenrådig eller fordi økonomien ikkje gjer det mulig å setja ut dette arbeidet?
– Det hadde vore fint å ha eit galleri som tok seg av alt. Men når det ikkje skjer i det tempoet og med dei ressursane eg ønskjer, tek eg skeia i eiga hand.
– Har kunstnarrolla endra seg dei siste åra – det er ikkje lenger nok å skapa kunst, kunstnaren må også ordna det meste av det som ligg rundt?
– Moderne kunstnarar må meistra mykje meir sjølv, frå kunstproduksjon til økonomi og marknadsføring. Stadig fleire kunstnarar, som Damian Hirst, tek stadig meir av kontrollen sjølv, og flyttar ut av galleria. Men eg har gjort dette heile tida.
– Kva tener du pengane dine på?
– Eg jobbar ikkje med klesdesign lenger, fordi eg ikkje tener pengar på det. Eg tener pengane mine på det eg liker best å jobba med, nemleg biletkunst. Men så har eg jo alltid jobba tverrfagleg, med ei rekke uttrykk.
Til Venezia?
For 2019 er Myrvolds ambisjon blant anna å koma seg til Venezia igjen, der ho også var i 2011 og 2013 – som igjen genererte fleire oppdrag over heile verda. Ikkje som ein del av den prestisjetunge Venezia-biennalen der den norske kunstnaren Ane Graff neste år skal vera ein del av den Nordiske paviljonen - men samtidig som biennalen går av stabelen og byen er full av kunstog kulturinteresserte.
– Det som skjer off-Broadway i Venezia, som eg er ein del av, er i vekst og eigentleg vel så interessant som det som skjer på sjølve biennalen, meiner Myrvold, og legg til:
– Om eg har 40 år som aktiv kunstnar, er det 20 biennalar i Venezia eg kunne vore på. Men i staden for å sitja og venta på å bli invitert til eg blir 98 år, fiksar eg det heller sjølv.
Nå jobbar ho med å skaffa lokale, har to aktuelle kandidatar og håper veldig på eitt av dei. Men finansieringa er ikkje på plass.
– Eg har tenkt å stilla ut ei fortsetting av skulpturane av tvskjermar eg har jobba med dei siste åra, men så lurer eg også på å kuratera ei utstilling og ein performance-serie i tillegg, slik eg gjorde i 2013. Men det kjem an på pengane, seier Myrvold, som prøver å skaffa sponsorfinansiering til prosjektet.
– Så: Trur du at det blir Venezia i 2019?
– Får eg alle elementa på plass, er eg der. Eg har fått det til før. Men det er jo ikkje 100 prosent sikkert.