Er ikkje foreldre i Hå strikse nok når ungane bruker alkohol?
HÅ: Ting tyder på at unge i Hå startar tidlegare med alkohol enn i nabokommunane. I tillegg er tunge narkotiske stoff på veg inn i visse ungdomsmiljø.
Egil Ø Naerland
Det uroar koordinatorane i kommunen som jobbar med førebygging mot rus og kriminalitet, det uroar politiet, det uroar politikarane. Og det uroar foreldra.
Derfor samlast over 1500 unge, foreldre og politikarar i regi av Hå Høgre til to seansar for opplysing og innsikt i Jaeren Sparebank Arena på Varhaug torsdag middag og kveld.
700 foreldre vil vita meir Rundt 800 unge møter til ein time frå klokka 12 til 13, medan 700 foreldre har meldt seg til eit tre timar langt program frå klokka 18.00. Leiar av Hå Høgre, Gunn Dalen Håland, opplyser at talet på kvelden fort kan overstiga 800.
– Fantastisk at så mange foreldre vil skaffa seg innsikt. Det er eit godt utgangspunkt, seier Dalen Håland til Aftenbladet.
– Mykje er bra, men me ser ei negativ utvikling, seier den eine av to SLT-koordinatorar i Hå kommune, Johanne Erfjord.
– Dei som drikk er yngre enn før, og det er ikkje bare øl, men gjerne sprit, fortel ho.
Politikontakt Lars Risa Taksdal som aktivt møter ungdom på gata, understrekar at mykje er bra i kommunen, men han liker ikkje at rusbrukarane synes å vera yngre nå enn tidlegare.
Best å utsetja alkoholdebuten – Ung data-undersøkinga viser at unge i Hå er noko tidligare ute enn andre. Det er uheldig, fordi grunnleggande førebygging med tanke på bruk av alkohol og rusmiddel, er å utsetta debuten, understrekar Risa Taksdal.
Han fortel at politiet avdekker meir rusmiddelbruk enn tidlegare.
– Det treng ikkje bety at det er mykje meir bruk enn før, fordi politiet på Jaeren er styrka med tanke på dette arbeidet. Alle har søkelyset på det, då er det naturleg at fleire vert tekne.
SLT-koordinator Erfjord har ei oppfatning av at foreldre i Hå kanskje tenker «det er ikkje så farleg» når dei unge smakar alkohol første gongen.
– Foreldre i Time verkar å vera meir strikse, seier Erfjord.
Ho legg heller ikkje skjul på at ein del av dei unge i Hå går frå alkohol til andre rusmiddel, akkurat som i andre kommunar.
Frå cannabis til MDMA
– Det har lenge handla om cannabis, men me ser nå at tyngre stoff er i bruk, mellom anna MDMA, fortel Erfjord.
MDMA er eit syntetisk framstilt stoff som gir brukaren kjensle av å vera uovervinneleg, men har svaert vonde biverknader.
Utviklinga er bakgrunnen for at Hå Høgre fører vidare samlingar andre lokallag har hatt i Time og Sola.
– Me ynskjer å vekka engasjement i heile kommunen, me vil ha ungdommen sjølv, foreldra, politikarar, administrasjonen og gjerne alle innbyggarane på banen, seier styreleiar Gunn Dalen Håland.
Ho liker ikkje oppslag i media som fortel om vonde episodar i kommunen, ho liker ikkje dei negative signala.
– Me må spørja oss: «Er det slik? Kvifor er det slik? Handlar det om haldningane våre? Kva kan me gjera med det?»
Initiativ forpliktar
Gunn Dalen Håland er sosialrådgjevar ved Bryne vidaregåande skule der storparten av dei over 1000 elevane er frå nettopp Hå, Time og Klepp, og har slik god innsikt dei unge sine utfordringar.
Som leiar av Hå Høgre er ho klar på ein ting:
– Når me har teke initiativ til desse samlingane, forpliktar det partiet til konkret satsing til dømes gjennom budsjettet i kommunen der oppvekstseksjonen meiner det trengs større ressursar, seier Gunn Dalen Håland.