Kalendergåva

DRØSET: Den blanke kalenderen var som ei gåve. Ei kalendergåve for vaksne.

Tidleg januar var den aller finaste tida på året.

Kvart år fekk Direktøren for det heile ein tosidig kalender i papp. Kalenderen kom frå ei elektrikarbedrift som ein gong hadde gjort noko arbeid for Direktøren heime. Som ein slags årleg takk for sist. Ei diskret påminning om at elektrikarane stod klare om det skulle leggjast opp fleire spottar eller om varmekablane skulle ryka. Telefonnummeret stod på kalenderen.

Det var ein gammaldags kalender. Det var i seg sjølv gammaldags med ein fysisk kalender, alt hadde jo blitt digitalt og handhalde nå, også organiseringa av året. Men mens folk laga forseggjorde fotokalendrar, var det absolutt ingenting fancy med denne. Kalenderen var laga i kjip papp. Bortsett frå den ufikse elektrikarlogoen, fanst ingen forsøk på design.

Her var berre rekker og kolonnar med felt i kvitt og svak grøn. Nettopp dette appellerte så sterkt til Direktøren: Kalenderen såg ut som eit rekneark. Som eit dokument i Excel.

Direktøren for det heile elska excel-dokument. Ingenting kunne ordna den komplekse og forvirrande verda som eit godt rekneark. Her kunne ei kvar problemstilling få plass i rekker og kolonnar. Her kunne ein alltid finna eit svar, ein sum, ein fasit. Rekneark romma ingen tvil, ingen gråsone eller «kanskje». Her var det orden.

Aldri var det så god orden som tidleg i januar. Årets excel-ark var tomme, blanke, klare for å bli fylde ut – akkurat som kalenderen frå elektrikaren. Her fanst ingen avvik frå budsjett, berre fjorårets fasit og årets prognose. Her var ingen uventa merknader eller fotnotar, justeringar av prognosen. Frå Q1 til Q4 var berre eit stort, ope – men ordna – landskap. Og det var eit lyst landskap, fylt av optimisme, for inga bedrift planla å gå i minus. Sett frå januar ville dette bli eit godt år, eit år fullt av svarte tal.

31. desember på elektrikarkalenderen lyste rett nok raudt i skjemaet. Direktøren for det heile prøvde også i år å overtyda seg sjølv om at det var fordi årets siste dag var ein festdag, ikkje fordi året gjekk i minus.

Direktøren for det heile elska exceldokument.