Magnhild Harboe Kleppa er død
MINNEORD: Jordmor Magnhild Harboe Kleppa døydde 8.desember 2020, vel 80 år gammal. Mange vil minnast Magnhild med stor takksemd. Ho var jordmor i Hjelmeland i vaktsamarbeid med Strand i til saman 32 år.
Magnhild Harboe Kleppa var frå Forsand. Etter sjukepleieeksamen i Stavanger i 1963, utdanna ho seg til jordmor og arbeidde eit par år ved sjukehuset i Tromsø.
Ho kom til Hjelmeland på besøk til søstera, Ellen, som var helsesøster der. Ellen var gift med Svein S. Kleppa. Magnhild hadde tidlegare møtt Gunnar, bror til Svein. No vart Magnhild og Gunnar også eit par.
Med ein kombinasjon av stor fagkunnskap, vilje til å lytta og fylgja opp den einskilde, og eit mildt og oppmuntrande vesen, var Magnhild Harboe Kleppa i mange år sjølve tryggleiken for mange fødande i Ryfylke.
Ho og mannen Gunnar busette seg på fjellgarden Gjessfjell. Magnhild hadde slett ikkje den enklaste vegen då ho skulle ut på oppdrag, ofte nattestid og i alle slags ver. Ho følgde med til sjukehuset og sytte for naerleik og tryggleik anten dei nådde fram i tide, eller fødselen gjekk føre seg i bil eller i båt over Hidlefjorden. I 2004 vart ho utnemnt til Årets jordmor. Då fortalde ho om ein gong uveret var så sterkt at ho måtte be skipperen leggja båten bak Lindøy for å få ro til fødselen var over.
Magnhild engasjerte seg i Senterpartiet og vart etter valet i 1991 den første kvinnelege varaordføraren i Hjelmeland. Det var likevel jordmor ho aller helst ville vera.