Zaptec-vekst skaper arbeidsplassar på Tau
STRAND: Til neste år vil Zaptec selja dobbelt så mange elbil-ladarar. Westcontrol investerer for å møta veksten.
– No kan du sjekka om du treng briller, seier Torfinn Fiskå, produksjonsleiar hos elektronikkbedrifta Westcontrol på Tau.
I handa ligg plastbitar som knapt er synlege. Dei er på størrelse med, eller til og med mindre enn, sandkorn. Så små delar må til når Westcontrol produserer elbil-ladarar for Stavanger-bedrifta
Zaptec. I 2020 selde Zaptec over 20.500 ladarar. I 2021 tar dei sikte på mellom 40- og 60.000, eit mål dei blant anna vil nå med nysatsingar i Tyskland og Storbritannia.
Den ambisiøse storkunden til Westcontrol sørgjer no for at dei kan planlegga utbygging og nytilsettingar. I dag har dei rundt 50 tilsette som jobbar med ladarane.
– På fabrikken er me totalt cirka 120. Dei komande månadane skal me tilsetta rundt 20 nye, og mange av desse stillingane vil vera på Zaptec-produksjon, seier Leif Petter Skaar, dagleg leiar hos Westcontrol.
Utbygginga på nabotomta skal gje 4000 kvadratmeter meir å boltra seg på for Westcontrol. Investeringane i bygg og utstyr ligg ifølgje Skaar opp mot 100 millionar kroner.
Vaks ut av kontorlokalet
– Zaptec hadde ikkje eksistert utan Westcontrol, seier Zaptecsjef Anders Thingbø, som set pris på å ha produksjonen så naert eige kontor.
Også Zaptec har vekse ut av eige lokale. Dette løyser dei ved å flytta inn i eit dobbelt så stort lokale cirka 50 meter unna der dei no er, så dei held seg på Ullandhaug.
Så langt i år har dei tilsett 14 nye medarbeidarar, slik at staben frå mai av kjem til å vera oppe i 43. Mot slutten av året siktar dei seg inn mot 50.
I 2019 selde Zaptec Charger ladarar for 156 millionar kroner. Resultat før skatt var på 21 millionar kroner.
– I fjor var hadde me 219 millionar i omsetting, seier Thingbø.
Zaptec er ikkje den einaste bedrifta i Rogaland som sel fleire og fleire ladarar. Easee, som inntil nyleg også hadde kontor på Ullandhaug, opplever det same. Selskapet, som blei oppretta i 2018, leverte i fjor 70.000 ladarar.
I januar flytta 54 Easee-tilsette inn i eit stort kontorbygg på Forus, der også dei har rigga seg for vidare framgang. Easee-ladarane blir produserte hos Norautron i Horten, men Easee treng meir kapasitet og vurderer bygging av ny fabrikk i Rogaland.
Maskinar gjev konkurransekraft
Ein må vera jorda for å få lov til å koma inn i produksjonslokalet til Westcontrol. Er ein ikkje det, kan det bli trøbbel om ein kjem i kontakt med elektronikken. For dei som ikkje har sko som sørgjer for jording, finst det ei stripe ein kan festa under skosolane.
Med desse på plass får ein godkjent-lys av maskinen som klarerer gjestane. Har ein i tillegg munnbind og kvit fabrikkfrakk på seg, er ein velkomen inn. Her kan ein følgja heile prosessen frå dei ørsmå delane til dei ferdige ladarane som står pakka på pallar, klare for å bli sende til norske elbileigarar eller ut i den europeiske marknaden.
– Desse fekk me inn for to veker sidan, seier Fiskå og viser fram to automatiske lagertårn.
Tid spart, pengar spart. Westcontrol har investert i fleire nye maskinar som skal gjera produksjonen meir effektiv. Dette er dei nøydde til for å vera konkurransedyktige i ein global elektronikkbransje der den norske arbeidskrafta er langt dyrare i drift enn ho er i konkurrerande land.
Rett til vêrs på børsen
I oktober gjekk Zaptec på børs. Ikkje på hovudlista til Oslo Børs, men på det som då heitte Merkur Market, og som no går under namnet Euronext Growth. Her er krava til børsnotering noko lågare.
For mykje pengesnakk kan gå ein til topplokket. Me må ikkje ta av slik dei gjorde på 80-talet. Dette er ikkje ein fest der alt er lov. Me er litt gammaldagse og køyrer «business as usual».
Anders Thingbø, Zaptec-sjef
– Euronext Growth er som paintball samanlikna med den ekte krigen med skarp ammunisjon som ein finn på den vanlege børsen, seier Thingbø.
Nykomaren fekk ein svaert varm velkomst.
– Aksjen har stige 500 prosent. Me surfar på ei grøn bølge, seier marknadssjef Lasse Hult.
Ein av dei som har fått nyta godt av dette, er den største eigaren, Stavanger-selskapet Valinor, som Lars Helge Helvig står bak.
16. februar selde Valinor seg ned i Zaptec. Kvar aksje var då verdt 60 kroner, mot 10,91 kroner som var kursen då Zaptec gjekk på børs. Handelen var verdt omtrent 445 millionar kroner.
Salet blei gjennomført sjølv om Valinor hadde inngått ein «lock up»-avtale ved børsnoteringa og eigentleg var låst til å sitja på aksjane ei stund til. Ifølgje Finansavisen blei salet likevel godkjent på grunn av sterk interesse for aksjane og gunstig utvikling i aksjekursen.
Thingbø ønsker ikkje å kommentera sjølve salet.
– Valinor har vore med oss sidan 2013 og er ein langsiktig eigar, seier han.
Åtvarar mot 80-talsfest
Ved å går på børs har Zaptec valt ein annan strategi enn konkurrenten Easee, der tilsette og gründerane eig ein god del av selskapet.
– Børsen gjev tilgang til mykje kapital som me treng til vekst. Me ser ikkje på børsen som ein trussel. Men det er jo lettare å seia at det var ein god idé å gå på børs når det går oppover, seier Thingbø.
Sjølv om ein kan stilla spørsmål ved om den grøne bølga på børsen kanskje er blitt litt vel høg, så meiner Thingbø at det generelt sett er positivt at kapital flyt over i dei grønare delane av marknaden.
– Kapital er makt. Eg håper kapitalen kan bidra til å nå berekraftsmål, seier Thingbø.
Sin eigen børssuksess tar han med fatning. Han understrekar at dei framleis er i oppbyggingsfasen.
– For mykje pengesnakk kan gå ein til topplokket. Me må ikkje ta av slik dei gjorde på 80-talet. Dette er ikkje ein fest der alt er lov. Me er litt gammaldagse og køyrer «business as usual», seier
Zaptec-sjefen, som veit at børsen kan vera brutal.
Allereie den 24. februar, veka etter intervjuet blei gjennomført, skriv E24 at Euronext Growth er i fritt fall, og Zaptec er eit av selskapa som denne dagen har eit nedgang på over ti prosent.
Satsar i billandet Tyskland
I fjor sommar sa Thingbø at han håpte ein tredjedel av omsettinga for 2020 skulle koma frå utlandet. Det målet nådde dei.
– Sverige og Sveits tok av, og me starta opp i Danmark, seier Thingbø.
Zaptec satsar vidare i den europeiske marknaden.
– Me har tilsett landssjefar i Tyskland og England. Ambisjonen er at me skal ha ti tilsette i kvart av desse landa. Billandet Tyskland er ein teknisk krevjande marknad, seier Thingbø.
Fram til no har hovudproduktet deira vore ladarar som er tilpassa sameige og burettslag. Programvara og skyløysinga deira skal sørgja for at den tilgjengelege straumen blir effektivt og rettferdig fordelt. Thingbø tyr til «sosialdemokratisk» for å skildra systemet.
Men no er individualistane som skal få sitt. Zaptec har utvikla ein nett liten ladar som har fått namnet Zaptec Go. Med denne ladaren siktar dei seg inn i marknaden for einebustadar og hyttar, ein marknad konkurrenten Easee lenge har satsa tungt på.