Finnbiffen
DRØSET: Ei tøff veke var over. Ei tøff veke stod for tur.
– Dei har det jo fint her ute på landet. Eg ser jo det, sa Graah Støre og myste ut over dei snøkledde markene. Det knirka kaldt i snøen, innlandskulda hadde festa seg solid i landskapet. Her var ikkje antydningar til vår eller varme sjølv om sola skein frå blå himmel.
– Ja, det er det godt å koma seg ut på landet etter ei veke inne i byen, sa Slagsmål Vedum og myste utover markene, han med.
Så stod dei der og speida.
Her var ikkje ei vindmølle å sjå. Ikkje eit reinsdyr. Ikkje ein same.
Graah Støre hadde tatt på seg den blå mariusgenseren over den lyseblå skjorta. Han køyrde same antrekk som på budsjettkonferansen i fjor, det hadde fungert fint. Men nå kjende han at det blei for kaldt. Temperaturen hadde gått ned på Klaekken i år. Så snart den tradisjonelle fotoseansen med regjeringa i ulike grader av strikketøy var over, skulle han sanneleg få på seg den blå boblejakka igjen.
– Frys du ikkje? sa Graah til Slagsmål. Han hadde lyst til å spørja – spøkefullt – om Slagsmål ikkje hadde fått memoet om strikkegenser. Helst med mønster. Slagsmål hadde nemleg på seg ein heilt vanleg mørkeblå genser – med open glidelås i halsen. Det såg kaldt ut. I tillegg braut det med det nøkterne strieskjorte og havrelefse-temaet for årets første budsjettkonferanse, symbolisert gjennom strikkegenserar.
Her var ikkje ei vindmølle å sjå. Ikkje eit reinsdyr. Ikkje ein same.
Men det var ei tid for alt. Og no var ikkje tida for å prøva å vera morosam.
– Nei, eg har vore ute ein vinterdag før, eg, svarte Slagsmål – og lo hjarteleg av sin eigen spøk.
Graah angra på at han var så skikkeleg. Han måtte prøva å losna litt opp, sjølv når det butta imot. Bli litt ledigare, ikkje vera så redd for å seia noko feil. Han kunne vera morosam, han visste det godt. Men så blei det alltid så mykje alvor, alltid så mykje kjeft. Alltid nokon som reagerte eller tolka alt i verste meining.
– Trur du dei serverer finnbiff til middag, sa Graah og nikka smilande i retning hotellet.
– Det må du for all del ikkje spøka med på pressekonferansen, kom det kontant frå Slagsmål.