– Eit soleklart løft
HANDBALL: Suksessen til Sola i Europa og eliteserien blir lagt godt merke til. I sist landslagsuttak hadde ingen klubbar fleire spelarar enn Sola. Det trur trenar Steffen Stegavik gjer klubben meir attraktiv.
Dette har aldri skjedd før:
– Det er kjekt at jobben vi gjer blir verdsett. Det viser at du kan bli god her, og det er berre positivt. Samstundes gjev dei ein giv inn i gruppa og for meg. Det viser at vi faktisk er så gode at spelarane snuser på landslagsplass. Eit soleklart løft for oss, seier Steffen Stegavik.
Torsdag blei ein ny milepael nådd for Sola. Heile tre av lagets spelarar blei tatt ut i Thorir Hergeirssons landslagstropp. To av dei debutantar: Kristiane Knutsen og Live Rushfeldt Deila.
Kristina Sirum Novak var også tilbake i troppen etter ein lengre sjukdomsperiode. Heime sit Camilla Herrem som nyleg har fødd og difor var uaktuell for landslaget no.
Europa-spel avgjerande
Trenar Stegavik er ikkje i tvil om kva som har vore avgjerande for landslagsplassen til sine utøvarar: Europa-spel. Han trekkjer fram viktigheita av internasjonal matching i kvardagen.
– Gjer landslagsuttaket at Sola er meir attraktiv som klubb?
– Det håpar eg. Så blir spelarane mine meir attraktive til å bli henta òg. Vi blir jo stolte av at vi får dei opp og at dei får sjansen. Det er sikkert ikkje mange som hadde sagt at vi skulle ha tre landslagsspelarar på ei samling, der leiinga faktisk kan velje mellom alle proffane, seier han.
Kan felle gamle lagvenninner
Søndag startar Solas jakt på ein plass i «Final four» i europaligaen når tyske Thüringer gjestar Stavanger Idrettshall for den første av to kampar i kvartfinalen. I fjor rauk Sola ut i kvartfinalen mot rumenske Baia Mare.
Ei som fort kan vise seg å bli sentral søndag, er keeper Rinka Duijndam. Ho spelte for nettopp Thüringer sist sesong og fortel at laget har endra seg mykje sidan ho forlét klubben.
– Eg gler meg til å sjå dei og trur det blir ein bra kamp. Eg trur vi er ganske jamgode. Vi har ein god sjanse, seier keeperen.