Kvifor trong vi nye kontorlokale til Helse Vest?
HELSE VEST: Det er sjølvsagt legitimt å stille spørsmål og meine noko om leigeprisen Helse Vest betalar i nye lokale. For oss handlar det om økonomi, men også om betre samarbeid, effektivitet og berekraft.
Vi veit godt at sjukehusa står i ein krevjande økonomisk situasjon, og forstår at det blir debatt om bruk av pengar i sektoren.
At Helse Vest no har fått gode lokale, betyr ikkje at vi trur vi er viktigare enn andre. Spesialisthelsetenesta er eit stort puslespel, der alle er like viktige. Alle dei 34.000 medarbeidarane i spesialisthelsetenesta jobbar for at befolkninga på Vestlandet får likeverdige og gode sjukehustenester.
Prosessen
Det regionale helseføretaket sitt ansvar er å ivareta ansvaret vi har for regionen – i tillegg til vår eigen organisasjon. Her arbeider dyktige medarbeidarar kvar dag for å løyse oppdraget vi har frå departementet, i tett samarbeid med sjukehusa.
Etter 20 år har vi flytta frå Forus til Stavanger sentrum. Rammene for husleige har vore dei same i åra på Forus som dei er no. Den nye, totale leigekostnaden er tilnaerma lik det vi hadde tidlegare.
I tre år har vi sett på ulike stader mellom Sandnes og Stavanger. Vi byrja med 18, og vurderte fem av dei meir nøye. Helse Vest har vedtekter som seier at kontorstaden skal vere i Stavanger kommune. Til slutt stod to lokale igjen, som begge vart vurderte etter ei rekkje kriterium, mellom anna økonomi, berekraft, produktivitet, samarbeid, trivsel, tilgjengelegheit og at det skulle vere tilstrekkeleg med både ope kontorlandskap og lukka kontor.
Vi arbeider mykje med nasjonal koordinering og utgreiing, og treng lokale som legg til rette for teamarbeid og digitale møte i stort omfang – mellom anna for å redusere reiseaktivitet. Utgreiinga av arbeidsplassar for departementa ligg også til grunn for løysinga vår.
Tettare og betre
Vi er over 80 medarbeidarar i det regionale helseføretaket, og dei nye lokala legg godt til rette for samarbeid på tvers av fag og avdelingar. Vi meiner vi allereie jobbar tettare og betre saman. Vi har sett kor ineffektivt det kan vere med lokale som ikkje legg til rette for dette. Slik lokala våre no er utforma, legg dei til rette for at vi treng mindre lokale enn vi elles hadde trunge.
Lønnskostnader er Helse Vest og sjukehusa sin største kostnad. Helse Vest er det minste av dei regionale helseføretaka i landet, set opp mot talet på medarbeidarar og befolkning vi dekkjer. Vi er opptekne av å ha ein så slank og effektiv organisasjon som mogleg hos oss – også når vi har fått auka mengd med oppgåver. Dei nye lokala legg til rette for framleis låge lønnskostnader, samanlikna med dei tre andre regionale helseføretaka.
Vi har fått fine og funksjonelle lokale. I tillegg har vi brukt opp att møblar og utstyr vi hadde, så langt vi kan. Det miljøvennlege perspektivet er viktig for oss. Mange har fått kortare reiseveg, ingen har fast parkering, faerre køyrer og fleire går, syklar og bruker kollektivtransport til jobb.
Det er noko dyrare å ha arbeidsplassar i sentrum enn andre stader. Basert på alle kriteria vi hadde då vi skulle velgje nye kontorlokale, blei Stavanger sentrum likevel vurdert som rett plassering av Helse Vest.
Dei nye lokala legg godt til rette for samarbeid på tvers av fag og avdelingar.