Opprørt over tvang
Bø Ap er på krigsstigen mot Fylkesmannen som innstiller på tvangssamanslåing av dei tre kommunane i midtfylket.
PARTITOPP:
– Respektlaust av Fylkesmannen som held innbyggjarane våre for narr. Dette minner om den gamle embetsmannsstaten, seier lokallagsleiar Arvid Hagen i Bø Arbeiderparti til Varden.
Klar tale
– Bø har hatt tolv kommunestyremøte om kommunereforma, folkerøysting og opinionsundersøking. Bø har sagt ja til Sauherad, men nei til Nome og Nome har sagt eit rungande nei til Bø. Likevel tilrår Fylkesmannen tvangssamanslåing av dei tre kommunane. Det me har sagt lokalt betyr ikkje noko. Politikarane i midtfylket har kasta bort mykje tid på denne saka som er ein kraftig knekk for demokratiet, seier den opprørte Ap-toppen.
Uromoment
Leiaren i Bø Ap understrekar vidare at prosessen med samanslåing av Bø og Sauherad er godt i gang, og at tilrådinga frå Fylkesmannen er eit uromoment.
– Den er veldig beklageleg og underleg at to kommunar som er blitt samde skal straffast. Me vil ikkje ha ulefossingane med oss. Arbeiderkulturen der passar ikkje inn i Bø. Dei har fyra godt opp under denne prosessen, og
SENTRAL:
har seg sjølv å takke for det som skjer. Dei har ikkje mykje sympati frå meg, og motstanden mot Ulefoss i Bø er ikkje blitt mindre etter det som har skjedd, seier Hagen. Han trøystar seg med at Stortinget neppe vil godta ei slik samanslåing.
Partitoppen undrar seg vidare over at berre midtfylket blir omfatta av tvangssamanslåing i tilrådinga frå Fylkesmannen. Prosessrettleiar hjå Fylkesmannen i Telemark, Per Deli, seier i ein kommentar at meininga var at Fylkesmannen skal gje ei uavhengig tilråding.
Ikkje snill eller slem
– Me gjer ikkje dette for å vere snill eller slem. Våre oppgåve er å kome med tilråding etter at kommunane har fatta sine vedtak. Stortinget har gått for friviljuge løysingar, men sagt at det kan vere unntak i spesielle situasjonar.
Etter vårt syn kan ein vurdere unntak og nytte tvang for dei tre kommunane i midtfylket. Regjeringa skal drøfte om saka bør sendast over til Stortinget. I tilrådinga gjer me også greie for heile prosessen, seier Per Dehli.