-Må ta matte undervisning i bussen
Skuledagen er sprengt for elevane i Vinje. Det store friminuttet har krympa til 15 minutt.
For ti år sidan var den same pausen på 40 minutt.
– Her oppe er det skuleskyssen som styrer pedagogikken. Dersom den bebuda ekstra timen kjem i matematikk, må elevane ta undervisning på bussen. Me har ikkje meir å gå på. I løpet av dei siste åra har undervisninga blitt utvida med 300 minutt i veka, seier assisterande rådmann Anders Sandvik til Varden. Sandvik får full støtte av ordførar Jon Rikard Kleven (Sp).
– Me trudde skuleskyssordninga var til for elevane på skulen, og ikkje motsett. Andre stader, der elevane går eller syklar til skulen, kan dei byggje ut undervisninga i tråd med ekstra timar. Her oppe fører den ekstra undervisninga til kortare pauser for elevane. Mange av desse har ei arbeidsveke - inkludert transport - på 37 timar. Det er ein heftig skulekvardag, legg dei to Vinjetoppane til.
Møtt med arroganse
Både ordførar og rådmann føler at dei så langt er møtt med arroganse i fylkeskommunen. Sjefane i Vinje kommune viser til at saka er teke opp med fylkeskommunen fleire gonger.
– I dag må elevane starte på skulen klokka 08.45 og avslutte dagen 14.25. Dersom dei kunne byrje klokka 08.15, og avslutte dagen 14.30, ville problema vore løyst. Skuleskyssen stoppar dette. Fleire elevar kjem òg for seint kvar dag på grunn av ordninga. Det blir vist til at transporten heng saman med resten av fylket. Det har me vanskeleg for å forstå i ein kommune som er like stor som Vestfold, seier Sandvik og Kleven.
Ikkje mogleg
Ordførar Jon Rikard Kleven understrekar at dersom timetalet blir auka ytterlegare, vil kommunen få eit avvik fordi dei ikkje klarer å oppfylle krava om opplaering.
– Eit slikt avvik er det ikkje mogleg å lukke med dagens skyssordning, seier han.
Leiar av samferdselskomiteen, Knut Duesund (KrF) seier i ein kommentar at han har forståing for problema, og at komiteen er blitt informert. Han varslar at det skal haldast møte om saka.
– Vinje føler at dei er møtt med arroganse?
– Me tek saka alvorleg og ser kva som kan gjerast. Intensjonen er å lytte og gjere meir, men alt kan ikkje løysast kjapt, svarar Knut Duesund.