Stormønstring i Vinje
Det gror godt i kulturlivet i Vinje. Ingen kommune i fylket kan varte opp med så stor kulturmønstring.
Kommunen hadde heile 108 deltakarar på Ungdommens Kulturmønstring (UKM) i Vinjehuset laurdag kveld. Dei serverte eit forrykande show med mange flotte prestasjonar. Arrangementet var saman med Tokke som stilte med fem deltakarar.
Litt nervøs
Ingebjørg Olbergsveen var ein av deltakarane på scena.
– Eg har sunge så lenge eg kan hugse. Har alltid vore glad i song. Eg har ikkje noko spesielt mål om å kome vidare, men trår til for å gjere mitt beste, seier 14-åringen som vedgår at ho er litt nervøs på scena. Jenta frå Åmot har Aurora som eit idol, og seier at ho får god respons på musikken sin. Ho spelar også fotball, og seier at ho liker den aktiviteten aller best.
Allsidig jente
Symre Taugbøl Bang har vore i landsfinalen dei to siste åra. I Vinjehuset spela ho mest gitar, men er òg glad i song og trakterer hardingfele. Symre er frå Kviteseid, men har ekstra musikkundervisning i Vinje.
– UKM er veldig bra. Der møter ein så mange ungdommar med like interesser, seier den blide tenåringen frå vestfylket.
Baud på folkemusikk
10 år gamle Ann Sofie Winther Bue har drive med kveding i halvanna år. Kvar onsdag dreg ho frå Edland til Åmot for å delta i musikkskulen. I Vinjehuset baud ho på stoff frå kjende namn som Talleiv Røysland og Aslak Høgetveit.
Jenta har hektiske dagar for ho er også med på riding i Rauland. – Musikken blir nok hobby i framtida, for eg er glad i dyr og har lyst til å bli veterinaer, fortel Ann Sofie Winther Bue.
Kunstutstilling
Totalt var det 26 musikalske inn- slag på scena under UKM. Men mønstringa var langt meir enn musikk – her hadde også mange kreative kunstnarar stilt ut arbeida sine.
Vinje har rike knivtradisjonar. Ungdommane Åsulv Vaa, Svein Tarjei Larsen Seltveit, Stian Skinnarland, Odd Lien, Pål Bakke, Joakim Bakke Øygarden, Mari Loftsgarden, Kristense Moi, Anja Frøland, Kristianne Gardsteig og Renate Moen Venheim er nokre døme på at denne folkekunsten lever vidare.
Totalt var det 29 innslag på kunstutstillinga, som også omfatta blant anna fleire måleri og teikneseriestriper.