Må leggjast til Vinje
Over heile landet blir den medisinske akuttberedskapen sterkt svekka ved at sjukehus blir lagt ned eller mistar det akuttmedisinske tilbodet.
Denne utviklinga er i strid med Stortingets prinsipp om eit likeverdig akuttmedisinsk tilbod uavhengig av bustad, men korkje regjeringa, Stortinget eller sjukehusføretaka syner vilje til å gjera noko med det.
I store område er folk avhengige av helikoptertransport for å koma raskt nok til sjukehus i samband med skader og akutt sjukdom. Norsk Luftambulanse meiner at ei flygetid på 20 minuttar bør vera norm for responstida, i situasjonar der kvart minutt tel. Størstedelen av landet og dei aller fleste byar og tettstader ligg naer nok eksisterande basar for ambulansehelikopter til at dei er innanfor denne norma, men det er framleis att kvite flekkar på kartet.
Hausten 2014 peika fylkesråd Per Gunnar Sveen i Hedmark, fylkesordførar Gro Lundby i Oppland og fylkesordførar Terje Riis-Johansen i Telemark i eit felles brev på at store område i dei tre fylka er utan god nok ambulansedekning, og kravde at Stortinget syter for å gjera noko med det. Lite har skjedd etterpå. Trass i at flytida frå naeraste helikopterbase til Vinje er meir enn 45 minuttar, er helseføretaka nøgde med akuttberedskapen, og regjeringa ser ikkje ut til å bry seg.
Vinje SV meiner at denne passiviteten er usolidarisk, opprørande og uakseptabel. Sjukehusa våre blir stadig betre til å yte livreddande behandling, men pasientane frå Øvre Telemark risikerer å koma for seint fram. Rjukan sjukehus er lagt ned, og fjerninga av dette tilbodet er ikkje på noko vis kompensert av ei vesentleg meir effektiv ambulanseteneste.
Vinje kommune har i mange år arbeidd for at det blir oppretta ein base for luftambulanse i Vinje, og vist at ei slik lokalisering vil dekkje så å seia heile det området i kring som i dag har for dårleg dekning. Det gjeld m.a. størstedelen av E134, der ein ventar ein kraftig trafikkauke etter at vegen fekk status som hovudsamband mellom aust og vest. Initiativet har massiv støtte både i og utanfor regionen Vest-Telemark, frå kommunane, naeringslivet, fastbuande, hyttefolk og transportørar.
Det har òg kome fram to andre ønske om lokalisering i Telemark: Skien (ved sjukehuset) og Notodden. Båe byane har akuttmedisinsk tilbod ved sjukehusa sine, og ingen av desse alternativa vil gjeva eit tilfredsstillande tilbod lenger vest. Telemark fylkeskommune ønskjer likevel at dei tre stadene kan bli samde seg i mellom, for å stå sterkare andsynes sentrale styremakter.
Vinje SV meiner at ønsket om ei slik semje er urimeleg. Sentraliseringa av spesialisthelsetenesta har ført til ei alvorleg underdekking av viktige helsetenester m.a. i Øvre Telemark. Når helseføretaket sviktar oppgåvene sine i dette området, har Telemark fylkeskommune eit politisk ansvar for å motverke dei negative resultata, ikkje forsterke dei. Me ventar at fylkespolitikarane skjer gjennom og støttar kravet om ein base for luftambulanse i Vinje.
Det same gjeld stortingskandidatane frå Telemark i valet til hausten. Ein betre test på kva det vil seia å representere heile fylket, er det sjeldan me får.