Nei til øl og vin
Berre Høgre sa ja til øl og vin i Bø Sommarland på St. Hanseftan.
Søknaden var oppe i formannskapet måndag. Bakgrunnen er at 23. juni er det storstilt feiring i Bø med direkte fjernsynsoverføring på TV2.
Ja frå rådmannen
Rådmannen sa ja til slik skjenking, og grunnga dette med at arrangementet/showet skjer på eit avgrensa område i samband med skifestivalen og Telemarks-veka som skal sendast på TV2. Det er venta rundt 5.000 menneske på showet. Rådmannen kunne avgjort saka åleine, men valte å bringe det prinsipielle spørsmålet inn for formannskapet.
Få problem
I ordskiftet fekk rådmannen berre støtte av Høgres Asbjørn Botnen, som meiner at dette er kurant fordi vakthaldet er bra og parken elles er stengt denne kvelden. Botnen viste til at søknaden gjeld eit enkelt arrangement frå klokka 18-22.30. Ifølgje Botnen er det fyrst ved sein skjenking at det oppstår vanskar.
Uheldig symboleffekt
Ordførar Olav Kasland (V) peika på at slik servering kan gje uheldig signaleffekt i og med at det er direkte TV. Kasland frykta derfor at folk rundt om i landet kan få inntrykk av at alkohol er ein del av tilbodet i familieparken.
Han fekk støtte av Glenn Isaksen (Ap) som sa at dersom fulle folk ravar rundt, så kjem det på TV. Partifelle Karin Hagen var klar på at det ikkje bør vere alkohol i ein park med barn og ungdom. Ho understreka det heller ikkje var noko sterkt ønske frå Sommarland sjølv om å få dette løyvet.
Varaordførar Borgar Torbjørn Kaasa (Sp) viste til at det blir servert alkohol på liknande arrangement i sentrum. Han var oppteken av like vilkår, men ved voteringa slutta Kaasa seg til fleirtalet.
Landa på nei
Bergit Askildt Myrjord (V) synest saka er vanskeleg, men landa på eit nei til alkohol i bygdas største turistattraksjon. Ikkje uventa gjekk KrF-representanten Kristin Digranes Bøen imot slik servering.