Skal spikre nytt namn
No startar diskusjonen om namnet på den nye kommunen. Blir det Midt-Telemark eller Bøherad?
Det skal arrangerast namnekonkurranse og innbyggjarane i Bø og Sauherad skal involverast via media og den sosiale nettstaden Facebook.
Ny namnegruppe
Nyleg var fellesnemnda for den nye kommunen samla til møte på Akkerhaugen. Der blei det oppretta ei namnegruppe. Varaordførarane Alf Rose Sørgaarden (KrF) og Borgar Torbjørn Kaasa (Sp) blei valte inn som to av medlemmene. Vidare skal dei to respektive kommunestyre oppnemne to medlemmer kvar i møta 27. og 30. mars. Målet er at gruppa på seks skal ha tre kvinner og tre menn.
Gruppa skal òg kome med tilråding på symbol - det vil seie utforming av kommunevåpen og ordførarkjede. Fellesnemnda kjem med innstilling og deretter skal kommunestyra i både Bø og Sauherad godkjenne både namnet og symbola.
Kongen avgjer
Etter det Varden får opplyst, skal Språkrådet uttale seg om kommunenamnet og Riksantikvaren om symbola før Kongen føretek den endelege godkjenninga i statsråd.
– Kommunestyra må gjere namnevedtak til hausten, så det byrjar å haste, var beskjeden frå prosjektkoordinator Per Dehli. Ordførar Olav Kasland (V) seier at namnevalet for mange nok er den mest følsame delen ved samanslåinga av Bø og Sauherad.
– Men stadene forsvinn ikkje - det skal framleis heite Hørte, Gvarv og Bø. Rauland blei slege saman med Vinje i 1960-åra, men folk seier framleis at dei skal til Rauland når dei reiser dit. Dei seier ikkje da at dei skal til Vinje, understrekar han.
Ulike meiningar
Varden lodda stemninga blant dei folkevalte etter møtet. MidtTelemark er ein heit namnekandidat, sjølv om dette er nemninga på dagens tre kommunar, inkludert Nome. Bøherad er eit anna namn som to sentrale Bøpolitikarar liker godt. Vidare har publikum kome med innspel om både Bø og Bø i Sauherad, får Varden opplyst.
– Bø vil nok bli eit vanskeleg namn for mange. Folk vil ikkje at Bø skal spise opp Sauherad, vedgår Sauherad-ordførar Mette Haugholt (Ap).
– Det nye namnet skal samle den nye kommunen, seier varaordførar i Sauherad, Alf Rose Sørgaarden.