Olav i kongemiddag
Olav Kasland er ein av 20 ordførarar i landet som er invitert i bursdagsselskapet til kongeparet.
– Kjempemoro og stas, seier Bøordføraren, som alt har svara ja på invitasjonen. Regjeringa arrangerer middag i Operaen onsdag 10. mai om kvelden i samband med at kong Harald fylte 80 år 21. februar og dronning Sonja rundar den same milepaelen 4. juli.
Spesielt utval
Kasland fortel til Varden at han ikkje har høyrt om andre ordførarar i fylket som er invitert til festen.
– Opphavleg ville protokollavdelinga i Utanriksdepartementet berre invitere embetsverket, det vil seie fylkesmennene, men statsminister Erna Solberg ønskte å ha med folkevalte representantar, seier Kasland.
Statsministeren har derfor valt 20 ordførarar ut frå storleik på parti, distrikt og oppslutnad ved valet. Kasland er plukka ut som den einaste Venstre-ordføraren.
Stiller i bunad
Antrekket i gallamiddagen er smoking og Kasland spurte spøkefullt på nettstaden Facebook om han kunne stille i bunad.
– Eg fekk mange svar, og alle meinte at eg kunne det. Eg stiller derfor i verdas finaste bunad. Eg har kvit jakke og kallar det Bø-bunad. I Aust-Telemark nyttar dei grøn jakke. Eg har høyrt at det skuldast at bøndene i Heddal var rikare enn kollegaene i Bø. Grøn jakke - med farging - var dyrare å produsere, seier Kasland.
Foreslo telemarksku
Gjennom Facebook spurde Bøordføraren vidare om gåvetips til kongeparet. Det mangla ikkje på kreative idear.
– Det har kome framlegg om alt frå telemarksku til heimelaga skjerefjøl der eg brenn inn kommunevåpenet. Det var Halvor Kleppen som kom med det siste framlegget, for han meinte at kongeparet vil setje pris på ei personleg gåve, seier Kasland med eit smil.
– Kua blir nok litt vanskeleg å ta med. Eg har litt sans for forslaget om å gje gåve til dei mange barnebarna. Da kunne jo billettar til Bø Sommarland vere aktuelt, men eg veit ikkje om dette er lov, seier ordføraren. – Du er republikanar? – Ja, i prinsippet, men i praksis er eg monarkist. Det er ikkje aktuelt å bytte statsform med det kongehuset me har i dag, svarar Olav Kasland.