Krav kraftig redusert
Hyttekongen Erling Svalastog kravde over 17 millionar kroner i erstatning frå Privatmegleren i Arendal. Han får rundt 1,5 millionar kroner.
Det er klart etter at dommen frå Aust-Agder tingrett vart offentleggjort torsdag. Striden har stått om informasjonen som blei gjeve til kjøparane om utleigeplikt ved salet av fritidsbustader på Leirgravstaulen i Rauland og Rauland Ferisenter. Kjøparane følte seg lurt, men Erling Svalastog la skulda på meklarfirmaet. Han saksøkte derfor det aktuelle firmaet, De Presno & Partnere AS (Privatmegleren i Arendal).
Vurderer anke
– Me er fornøgd med at ansvaret er lagt på De Presno & Partnere som har brote god meklarskikk, men er ikkje einig i utrekninga av erstatningsbeløpet. Derfor vil det bli vurdert å anke på sjølve pengebeløpet, opplyser advokat Christine Haugstvedt Downing fra Deloitte Advokatfirma til Varden. Ho var prosessfullmektig for Erling Svalastog.
Retten konkluderer med at de Presno har opptredd i strid med profesjonsansvaret og lova om eigedomsmekling for alle dei 19 oppdraga saka omfattar. Aust-Agder tingrett seier vidare at den kjennskapen Erling Svalastog hadde til utleigeplikta, hans eigne annonsar og manglande informasjon i desse om reguleringsformål og utleigeplikt, ikkje kan tilleggast saerleg betydning for meklaransvaret.
I samband med rettssaka kravde Erling Svalastog i overkant av 17 millionar kroner. Svalastog Eigedom får 1,6 millionar kroner i erstatning frå De Presno & Partnere og 150.000 kroner i tilbakebetaling av meklarhonoraret. Vidare får det andre Svalastog-selskapet Destinasjon Rauland AS også 150.000 tilbake frå meklaren, slik at samla erstatning vert 1,9 millionar kroner og på toppen kjem renter.
På den andre sida har retten frifunne meklarfirmaet for erstatningskravet frå Destinasjon Rauland - som galdt bustadene på Leirgravstaulen. Der er Svalastog dømt til å betale meklaren sine sakskostnader på 508.000 kroner, inklusive moms. Det høyrer med at Svalastog Eigedom må betale sine eigne sakskostnader, noko som gjer at nettoen til Svalastog på 1,5 millionar kroner krympar ytterlegare. Det står att å sjå om erstatningsbeløpet blir anka.