Rapport skaper røre
Eit notat om vassforsyning til hyttefelta Kovstaul-Russmarken i Tuddal skaper strid. No skal konsulentane lage ein ny versjon.
Notatet frå Norconsult, som blei lagt fram på eit møte på kommunehuset i Sauland sist fredag, konkluderer med at kommunen bør velje Sjåvatn som kjelde framfor å satse på private brønnar.
Ifølgje notatet blir Sjåvatn rundt 1,3 millionar kroner billigare enn å satse på private brønnar.
Både grunneigarane og hyt- teeigarane i området KovstaulRussmarken vil – som Varden skreiv i laurdagsavisa – nytte dei private brønnane som alt er i drift.
– Konklusjonen i notatet med at prisane er så like, og at Sjåvatn kjem best ut, er mystisk og påfallande sidan kommuneadministrasjonen har ivra for dette alternativet. Frå min ståstad er rapporten verdilaus. Det er ikkje teke omsyn til at det alt finst mange brønnar i området og at den mest gunstige løysinga vil vere ei trinnvis utbygging, seier grunneigar Håkon Bøen i ein kommentar til Varden.
– Kommunen kan ikkje halde på med dette, noko som kom tydeleg fram på møtet i Sauland. Full utbygging frå Sjåvatn er langt meir risikabelt økonomisk sidan det krevst mange nye abonnentar i åra framover, legg Bøen til.
Reiste frå møtet
Grunneigar Knut Buen seier til Varden at han reiste frå møtet i opprørt stemning.
– Alt som me har kosta av private brønnar er bortkasta og det dyraste alternativet blir å bruke eige vatn. Kommunen må forkaste eige vedtak om tvungen tilkopling av vatn, elles vil det bli veldig mistillit frå både grunneigarar og hyttefolk. Kalkylane er ikkje seriøse og akseptable, meiner Knut Buen. Han vil likevel vil gje ros til Russmarken VA for fin oppussing.
Inga bestillingsverk
Hydrogeolog Joseph Allen, som har skrive og presentert notatet, avviser at arbeidet til Norconsult er eit bestillingsverk frå Hjartdal kommune.
– Me har stått fritt og skriv det me meiner som konsulentar. Det som blei presentert er eit utkast og skal oppdaterast med meir informasjon. Me har ikkje laga kalkylar på trinnvis utbygging med brønnar, for dette var nemleg ikkje ein del av mandatet. Me skulle sjå på full utbygging. I neste runde skal me sjå på trinnvis utbyg- ging, Dette er ei kompleks sak og møtet med grunneigarane og hyttefolket var nyttig, seier hydrogeolog Joseph Allen.