Styreleiaren i Russmarken slår tilbake
Styreleiar Anne Karin Bakka Hagen slår kraftig tilbake mot påstandane om manglande tillit til Russmarken VA.
– Informasjonsskrivet som er sendt til ordførar og kommune-styrerepresentantar har kome til Russmarken VA via hytteeigarar. Tillit til styret er det berre generalforsamlinga som kan gje uttrykk for. Insinuasjonar om manglande kompetanse blir avvist på det sterkaste. Det er tvert imot stor kompetanse sidan tilsette i selskapet har over 30 års erfaring kvar innanfor kommunalteknisk kompetanse. Styret har tilsett desse personane på dette grunnlaget. I tillegg er landets leiande konsulentfirma valt til kalkylar og prosjektering, opplyser Anne Karin Bakka Hagen i ein epost til Varden som svar på spørsmål frå avisa.
Ho avviser også at det funne stad nokon kostnadssprekk.
– Derimot er det føreteke ein revisjon av kalkylen frå 2012 som da berre galdt avløp, totalt 140 millionar. Med Sjåvatn som vasskjelde blei dette auka med 110 millionar kroner - til 250 millionar kroner. Multiconsult gjennomførte kvalitetssikring og det gav 336 millionar kroner som resultat. Det er per i dag ikkje overskridingar i prosjektet, opplyser Bakka Hagen.
Ho meiner at prognosane om forventa tilkopling ikkje vil vere ein økonomisk risiko for kommunen.
Styreleiaren beklagar elles at grøftene er blitt breiare enn avtalt, men at det skjer nødvendig opprydding på berørte areal.
Dagleg leiar Knut Olsen i Russmarken VA viser til kommentar frå styreleiar, og ønskjer ikkje å uttale seg til Varden om saka.