Kunstskattar funne på eit loft på Gvarv
Leiinga i Nes Mållag gnir seg i hendene om dagen. Årsaka er at under opprydding i eigedomen deira Sole i Gvarv sentrum er det kome for dagen fleire kunstskattar etter treskjerargeniet Borgar Borgarsson frå Bø.
Nå i sommar skal kunstskattane, som Borgarsson har laga, under hammaren.
– Det er heilt uaktuelt for oss å gje bort desse gjenstandane. Truleg har dei ein verdi på fleire hundre tusen kroner, seier Gro Nomeland Gjerden, leiar i Nes Mållag.
Godt rennome
Kunstnaren Borgar Borgarsson var frå Roheimheia i Bø. Han var fødd 14. april 1836 og døydde i 1916. Den fattige guten var berre tre år gammal da han rissa roser i tre. Seinare arbeidde han seg opp og og fekk eit godt rennome. Borgarsson mottok såleis fleire stipend til opphald i utlandet, mellom anna Amerika. Han fekk også medaljer på utstillingar i fleire europeiske hovudstader.
Tilfeldig
– Det var tilfeldig at folk frå mållaget kom over klenodia på loftet på Sole. Alle gjenstandane var pakka godt inn og derfor gjorde målfolka store augo då dei såg kva som var innhaldet.
– Vår teori er at Borgar Borgarsson trong pengar. Han har enten gjeve frå seg utskjeringane eller sett dei i pant til Torgrim Bjørnson, som i si tid eigde Sole. Bjørnson var både kjøpmann og postopnar, fortel Gro Nomeland Gjerden, som ventar i spenning på auksjonen seinare i sommar.
Strid
– Reknar du med stridom desse gjenstandane?
– Det blir alltid krangel om slike skattar. Og det er nok dei som meiner at desse sakene bør bli i bygda. Dersom mållaget hadde hatt ein god økonomisk situasjon ville me teke vare på skattane sjølve.