Lise Fjeldstad til jubileum
Lise Fjeldstad er hovudattraksjonen på 150-årsjubileet for «Peer Gynt».
Jubileet foregår i Lunde kyrkje sundag 11. juni. Det var sommaren 1867 at Henrik Ibsen sat på Ischia i Napoligulfen og skreiv «Peer Gynt».
– Sidan sa han at denne perioden var den lukkelegaste tida i forfattarskapen, fortel Ragnhild Hagen frå Helgja som står som arrangør av jubileet.
Kven var han?
Skodespelaren Lise Fjeldstad skal halde føredrag om kven Ibsen var. Ho er trekkplasteret i eit spekka program med mange kulturelle innslag.
Wiggo Dahl opnar med «Morgenstemning, før ordførar Bjørg Tveito Lundefaret ønskjer velkomen.
Irene Holte Skugstad og Andreas Hoff skal framføre «Saeterjentens søndag», assistert av Wiggo Dahl på fiolin og Janne Villa på piano.
Holte Skugstad, som til dagleg arbeider som lege i Bø, skal vidare syngje «Solveigs sang», også der assistert av Dahl og Villa.
Meir musikk
Under jubileet blir det mange andre musikalske innslag. Wiggo Dahl byr på «Fiolinsonate i G-dur» medan Anders Hoff framfører både «Våren» av Grieg og «Ved Rondane».
’Olav Ajer byr på «De tre grønne jenter», segnet frå Flåbygd, og publikum får vidare møte danseelevar frå Nome kulturskule i «Dovregubbens Hall».
Kutta fingeren
Kristian Ihle Hanto skal halde tala for dagen. Temaet er husmannen Anders Løvigen frå Landsmarka som kom til tingstova i Landsmarka med ein kutta finger for å sleppe krigsteneste. Ein slektning av Ibsen var offiser i distriktet.
Galleri Karen frå Gvarv har på oppdrag frå arrangøren laga miniatyrfigurar av modellar frå «Peer Gynt». Desse blir stilte ut under jubileet i Lunde.
Erik Gjestvang frå Skien, som gav bort den enorme boksamlinga si til Vinje og flytta til fjellkommunen, er konferansier på jubileet.