De fleste vil ha Bøherad
Blant folk flest er Bøherad favoritten som namn på den nye kommunen i midtfylket.
Det stadfester leiar av namnegruppa, Borgar Torbjørn Kaasa, over for Varden. Fredag kveld arbeidde komiteen vidare med saka, før saka til slutt endar opp i dei to kommunestyra.
Totalt har det kome framlegg på 89 ulike kommunenamn. Om lag 300 personar frå Bø og Sauherad har sendt inn framlegg. Oversikta fortel at 85 av innsendarane vil at den nye kommunen av Bø og Sauherad skal heite Bøherad.
Det har kome 39 framlegg om Midt-Telemark kommune, 37 forslag om Bø, medan 18 personar meiner nykomlingen i Telemark skal heite Bø og Sauherad. Åtte innsendarar har foreslege Breisås som nytt kommunenamn. Bø og Saude er favoritten til seks innsendarar.
Nokre av innsendarane har kome med spøkefulle framlegg - som til dømes Bae kommune
Har betyding
– Dette er ikkje noko folkerøysting, men framlegga frå innbyggjarane vil ha betyding, seier Kaasa som er varaordførar i Bø.
Han stadfester at om han åleine hadde bestemt, ville det nye kommunenamnet blitt Bø eller Bøherad. Kaasa seier at Nome kommune har oppmoda om ikkje å bruke Midt-Telemark som namn, men at kommunestyra handterer dette.
– Bø som merkenamn er eit moment, men ikkje avgjerande for kva valet blir. Språkrådet har også talt. Dei er skeptiske til eit namn som Bø og Sauherad, men vil ikkje underkjenne det. Dette er ei vanskeleg sak, og tilrådinga kan ende opp med ei delt innstilling, ifølgje Borgar Torbjørn Kaasa.
Regjeringa avgjer
Med seg i gruppa har han Alf Rose Sørgaarden, Karin Hagen, Evy Beate Tveter, Wenche Akkerhaugen og Hans Kortner Ryen.
Kommunestyra i Bø og Sauherad skal handsame saka 21. august i år. Det er Kongen i statsråd som skal fastsetje det endelege namnet, ifølgje Borgar Torbjørn Kaasa. ▶ halvor.ulvenes@varden.no