Frå kanalen og vestover
Telemarkskanalen - Haukelifjell - Seljestadfjellet Sørfjorden, dette er noko som historisk heng sammen når det gjeld samferdsel.
No er Telemarkskanalen blitt freda og det er bra, men historisk sett så heng den sammen med vegen vidare, no tenker eg på reiseliv. Telematrkskanalen vart i utgangspunktet bygd som ein ny transportåre av varer til bygdane og tømmer mot kysten.
Men så skjedde det at dei reisehungrige og rike i Europa oppdaga Telemarkskanalen. Når vegen over Haukeli vart ferdig til same tid så vart dette ein populaer transportåre også for reiseliv, ein gullalder for reiselivet i dette området. Det vart og eit nytt, godt tilbod for dei som måtte reise mellom Austlandet og Vestlandet.
Dette hadde nok utvikla seg til noko mykje større enn det vart, hadde det ikkje vore for utbrotet av den fyrste verdenskrigen.
Ser ein korleis trafikken gjekk på den tid, er det interessant å tenke seg at det er mogeleg å laga eit historisk reiselivstilbod. Når dei reisande på ymse måtar hadde kome seg til Skien var det å fylgje Viktoria og dei andre båtane til Dalen. Så var det tre dagars karjoltur over fjella til Odda og så var det på ny båttur ut Hardangerfjorden til Norheimsund, med ein ny karjoltur fram til Bergen. Dette ligg i botn.
Tenker me oss no så kan me laga til historiske fellesturar der det vert spesielt opplegg med tidsaktuelle klesdrakter både på båtane og på hotella, eg tenker då på Dalen Hotell, Haukelisaeter Fjellstoge og så er vel Ullensvang Hotell ute i Hardangerfjorden eit svaert aktuelt stad å avslutte denne rundturen med buss/båt. Det er mykje ein kan spela på når det gjeld historie.
No har det vore tyske reiselivsfolk og sett på sykkelvegen langs kanalen, det ligg planar om å laga den gamle vegen over Haukelifjell og Seljestadfjellet som sykkelveg. Den gamle Haukelivegen er kutta opp på mange stader i samband med bygginga av den nye, planen er å få knyte desse vegstubbane sammen og laga ein felles sykkelveg over båe fjella. Dette vil bli eit fantastisk tilbod for denne delen av det ferierande folket, og det ser ut til at dei aukar i omfang.
Problemet er at det er ikkje noko samarbeid mellom Telemark og Hordaland her, dei har nok med seg sjølve og det er trist. Eg har prøva ved mange høve å få til noko, men det er krefter som er meir interessera i å utvikle lokale aktivitetar i staden for å få til samarbeid, som til slutt er med på å utvikle også det lokale.
Når me snakkar om reiseliv, så er dette ei «masse» i bevegelse, den stoppar ikkje opp nokon stad, men må vidare.
Når det gjeld Telemark så meinar eg det er feil å koble Telemarkskanalen mot Gaustatoppen slik det vert gjort, her må me tenke på andre måtar, korleis gjeng trafikken, jau den går aust vest gjennom dalføra og over til fjordane på andre sida. Då må samarbeidet også gå på same måten. For dei som likar ekstrem natur så har me Gaustatoppen, Prekestolen, Folgefonna og Trolltunga, dette er noko som ligg naturleg tilrette for ein fellesmarknadsføring.
Mogleghetane ligg her, me har Haukelivegen - E134 som ein viktig transportåre og som fordelar trafikken ut på sidevegane til dei bygdene som har noko å tilby til dei reisane. Men då er det viktig at me i fellesskap fortel kva me har å tilby i dei bygdane som naturleg kjem inn under dette fellesskapet i desse to fylka, eller om det er mogeleg fleire fylke.
Det var denne tanken eg har i bakhovudet når eg på nettsida www.haukelivegen.no snakkar om «Sørnoreg rundt over Haukeli». Alt sør for Haukelivegen er i utgangspunktet eit reiselivsområde og kan marknadsførast sammen og har utruleg mykje å gje dei reisande.
Det er eit par partar som eg meinar har eit spesielt ansvar og det er fylkeskommunane og marknadsføringsselskapa i dei to fylka, det er viktig at nokon tek tak i det og luftar denne tanken, for eg er sjølvsikker på at det eg her har lagt fram har noko for seg, når det gjeld utviklinga av reiselivet i dette området. Det er for mange «småkongar» som prøvar å laga sine eigne kongeriker rundt sine bedrifter, og det har ikkje framtida for seg.
Vår geografi legg opp til at det er utruleg lettvint å få til eit samarbeid mellom aust og vest dersom berre viljen er der.