– Hadde veldig flaks
Ingebjørg Bratheim Bø er overvelda over sigeren på Landskappleiken i helga.
Fyrsteplassen i dans klasse A medførte kongepokal til Bøkvinna som til dagleg er journalist i Telemarksavisa. Pokalen deler ho med dansepartnar Ola Narverud frå Jondalen. Dei to har dansa saman sidan 2009, og skal framover ha den gjeve pokalen i stova eitt år kvar.
– Eg såg ikkje den sigeren kome og er veldig overvelda. Kongepokalen blir delt ut i dans kvart åttande eller niande år, så me hadde flaks som fekk den det året me vann, seier Ingebjørg Bø i ein prat med Varden.
Lang fartstid
Fyrste gongen ho dansa på Landskappleiken var i Rauland i 1994. Alt tre år før debuterte ho på Voss i felespel i juniorklassa.
På årets kappleik konkurrerte Ingebjørg Bø og Ola Narverud med to andre par som båe har vunne klassa tidlegare. Paret kvalifiserte seg til finalen laurdag ettermiddag da dei dansa telespringaren Kivlejenta. Under finalen om kvelden svinga dei seg etter springaren Bøkor rennar.
– Samspelet oss mellom fungerte veldig bra. Me hadde ein fantastisk dansespelemann i Ottar Kåsa, seier kongepokalvinnar Ingebjørg Bø.
Det blei fleire sigrar til Telemark i dans. Aud Manheim frå Seljord og Johan Vaa, Rauland vann dans hardingfele klasse D. Knut Boksasp Berge, også frå Tinn, vann halling klasse C
Kom tilbake
Telemark har dominert i hardingfele klasse A dei sju siste åra. Denne gongen spela Jan Beitohaugen Granli frå Øystre Slidre seg tilbake til toppen med 90 poeng. Han har vunne klassa fleire gonger, sist i 2009. Lars Ingar Meyer Fjeld, opphavleg frå Sandefjord, men no musikklaerar i Bø, tok ein fin andreplass - to poeng etter vinnaren. Ottar Kåsa og Per Anders Buen Garnås, båe busette i Bø, delte tredjeplassen med 87 poeng, så her var konkurransen knivskarp.
I hardingfele klasse B fekk Birgit Haukås frå Tinn andreplass, eitt poeng etter vinnaren. Unni Boksasp, sikra seg andreplassen i vokal A - eitt poeng etter Øyonn Groven Myhren. Ingvill Marit Buen Garnås frå Bø og Hjartdal vart nummer fire i denne klassa.
Nytt heidersmedlem
Under meisterkonserten sundag vart Johannes Sundsvalen frå Sauherad utnemnd til heidersmedlem i Folkorg, Organisasjon for folkemusikk og folkedans. Han får prisen for den opplaeringa han har drive med i 40 år og som sikrar at slåttearven lever vidare.