Reagerer på truslar
Bø Arbeiderparti reagerer på at ein sjukeheimspasient blei truga med politiet.
Som Varden fortalde sist veke, vart Sverre Fiskaaen (90) truga med politiet da han ikkje ville flytte ut av korttidsplassen på Gvarv som Bø kommune leigde av Sauherad.
Fiskaaen uttala til avisa at han var svaert skuffa over handlemåten til dei ansvarlege i Bø kommune.
Handlar om respekt
– Kommunen har ei omsorgsplikt. Uansett om folk har krav på sjukeheimsplass eller ikkje, så handlar denne saka om å behandle gamle og sjuke folk med respekt og oppføre seg ordentleg, seier gruppeleiar for Bø Ap, Glenn Isaksen, til Varden.
Tek opp saka
Han får full støtte av partifelle Åshild Øygarden, som er fast medlem av helse- og velferdsutvalet og vararepresentanten hennar der, Henry Bråthen, også Ap.
– Eg vil ta opp saka på møtet i utvalet onsdag og få ei orientering frå administrasjonen i kommunen, seier Åshild Øygarden.
Henry Bråthen er tidlegare lensmann i Bø.
– I mine 40 år i politiet har eg aldri opplevd at ein sjukeheimspasient har blitt truga med politiet. Det er vel heller det motsette - at me har fått folk som treng plass dit. Eg trur nok også politiet ville ha vegra seg for å hente pasienten viss dei hadde fått spørsmål om dette. Saka her handla om ein mann som aldri har gjort noko gale. Å truge med politiet i ein slik situasjon er ikkje bra. Eg vil beklage på vegner av kommunen, og vil vel tru at også andre parti reagerer på denne framgangsmåten, seier Henry Bråthen.
Åshild Øygarden og partifellane fortel til Varden at oppslaget med Fiskaaen skaper frykt i bygda, og fleire seier at dei er redde for å bli gamle i Bø.
– Helsesjefen uttala til Varden at kommunestyret har heva terskelen for å få sjukeheimsplass?
– Dette er ei tolking frå administrasjonen, svarar gruppeleiar Glenn Isaksen.
God omsorg
Ap-toppane er på generell basis svaert godt fornøgd med eldreomsorga i kommunen.
– Både leiinga på sjukeheimen og pleiarane der og i heimesjukepleia gjer ein kjempejobb, seier representantane for Bø Ap. Helse- og velferdssjef i Bø kommune, Terje Kili, ønskjer ikkje å kommentere saka.