Jubilerer med nytt årsskrift
Tokke historielag går inn i sitt førtiande år, og markerer det med eit fyldig årsskrift.
Det blei lansert nyleg i biblioteket på Dalen.
– Laget har ei viktig oppgåve med å ta vare på dei lange linene og på røynsle som me kan bruke for å leve godt i vår del av Telemark, skriv styreleiar Gunnar Grøstad Johnson i føreordet til årsskriftet.
Laget har gjeve ut ei slik bok nesten kvart år sidan det vart stifta av Olav Grimdalen i1978.
Innspel i Varden
Fyrste artikkelen er om Torbjørg Ripilen i Mo, som døydde i 1892. Ho var ein av informantane til Molkte Moe
For snaue to år sidan skreiv Erling Furunes i Varden og Vest-Telemark Blad om at minnesmerket etter henne var i dårleg stand. Det innspelet tok styret i Mo grendelag på alvor og restaurerte steinen. Den vart reist opp att i april i fjor. I artikkelen gjev historielaget ros til grendelaget for innsatsen.
Minnesteinen vart avduka 19. august 1956 under ein seremoni med sokneprest Bjarne Nenseter og kunstnaren Henrik Sørensen.
Løypemøtet på Ofte
Årsskriftet inneheld elles fleire artiklar om løypemøtet på Ofte i 1866. Torgrim Otterholt og Arne T. Aabø skriv om dette. Gunnar Grøstad Johnson fortel om Olavsarven i Telemark, Halfdan Johre om taubanen på Vistadheii og Birger Bastiansen om krigsåra. Torild Andreassen skriv om bergverkshistorie frå Lårdal, for å nemne nokre av innslaga i årsskriftet som elles er pryda med fleire gamle bilete.