Gå etter dei store pengane
Kjaere Terje Lien Aasland (Ap), Lene Vågslid (Ap) og Solveig Sundbø Abrahamsen (Høgre). Gratulerer med valet! Vil krangelen om skattesatsane fortsette også etter valkampen, eller tør de ta tak i det verkelege problemet? Milliardane som forsvinn i skatteparadis.
Me er heldige som bur i Noreg: me får hjelp når me er sjuke, me treng ikkje betale for utdanninga vår og me har reint vatn i springen. Desse goda har me fordi me betalar skatt. Dessverre føregjeng det systematisk skatteunndraging i stor skala, og skatterådgjevarar gjer sport av å utnytte gråsoner og smetthol i lovverka. Multinasjonale selskap aleine snyt verda for 500 milliardar dollar i skatteinntekter kvart år. Det er tydeleg at dagens skattesystem ikkje er rusta for ein verkelegheit med kompliserte konsernstrukturar og hyppig handel på tvers av landegrenser. Det trengs ein skikkeleg oppdatering, og den har blitt utsett alt for lenge.
I dag ser me på multinasjonale selskap som mange små, sjølvstendige einingar, i staden for eitt stort selskap. Då kan selskapa enkelt flytte pengar mellom dotterselskap i ulike land og gøyme overskotet i skatteparadis. Det tappar den norske statskassa for pengar, men også statskasser i land der desse pengane trengs endå meir.
For det er låginntektsland som rammast aller hardast av skatteflukta. Dei får ikkje dei inntektene som skal til for å løfte befolkninga ut av fattigdom og auke levestandarden. Det er verkelegheita no: skatteunndraging hemmar utvikling kraftig.
I staden for å la dei multinasjonale selskapa flytte overskot mellom dotterselskap og inn i skatteparadis, må me sjå alle delane samla som eitt selskap, altså det dei faktisk er. Då kan ein sørgje for at skatten betalast der verdiane faktisk blir skapt.
Så kjaere Terje Lien Aasland, Lene Vågslid og Solveig Sundbø Abrahamsen: Vil de, som Telemarks representantar for Noregs to største parti, vil de gjere noko med det utdaterte skattesystemet og kapitalflukt?