Båten som revolus jonerte trafikken
«Den kvite svane» på Seljordsvatnet revolusjonerte trafikken i øvre Telemark.
Båten «Fjøllguten» gjorde det også langt lettare for folk i Grenland å kome seg vestover i fylket.
Midt på 1800-talet var ikkje dagens riksveg 36 langs Seljordsvatnet påtenkt (Manheimstrondi), og på vestsida av vatnet var dei stupbratte bakkane ved Telnes pluss mange andre stigningar.
Desse bakkane skal nesten ha teke knekken på hestar som gjekk i varekøyring frå Bø til Seljord.
Gjekk konkurs
Det høyrer med at bakkane blei lagt om i 1921. Kommunen fekk eit rentefritt lån på 84.000 kroner i Seljord Sparebank. Det førte til betre veg, men var truleg årsaka til at finansinstitusjonen gjekk over ende i 1929.
Den fyrste stimbåten på Seljordsvatnet var «Snarken», som skal ha vore eigd av nokre bøheringar med Tor Otterholt i spissen. Båten gjekk på ved og kol, og det er og fortalt at han vart fyra med konglar. Båten hadde ikkje den store kapasiteten, og dermed kom etter kvart «Fjøllguten» på vatnet.
Viktig dag for Telemark
Onsdag 16. desember 1874 blei på fleire vis ein historisk og viktig dag for heile Telemark. Denne kvelden sat karane frå «Den røde bule» i Skien og produserte det aller fyrste eksemplaret av Varden, som var på gata neste føremiddag.
Nokre mil unna sat sakførar Walløe, Leiv E. Bjørge, Jørund Telnaes, lensmann Grave og landhandlar O.A. Olsen og gjennomførte den fyrste ordinaere generalforsamlinga i «Fjøllguten». Generalforsamlinga vart halde på Ulveneset.
Denne staden, som ligg i austenden av vatnet, hadde brygge og var endepunktet for båttrafikken til og frå Seljord. Båten hadde blant anna stopp ved Sannes brygge på Garvik, der det var landhandel, postopneri og frå 1895 telefon.
Vegen frå enden av Seljordsvatnet gjekk vidare til Bø og Årnes Brygge, fyrst med hest, sidan bil. Frå Årnes gjekk ferda med båt over Norsjø til Skien.
To år seinare
I 1874 blei det sett mål om å skaffe seg båt to år seinare. Den draumen blei oppfylt. Båten vart bygd på Akers Mekaniske Verkstad i Christiania, men kjøpt i Langesund og henta derifrå. Den vart sett saman på Bjørge, og fekk namnet «Fjøllguten» – etter framlegg frå diktaren Jørund Telnes.
Båten vart registrert for 75 personar. Den hadde både fyrste og andre klasse, var fint innreidd og hadde både øl- og vinrett. Ei reise frå Ulveneset til Seljord, tur – retur, kosta 50 øre på ein messesundag.
Stor betyding
Historikar Odd Vidar Rui i Seljord har studert samferdselen i Telemark i farne tider.
– «Fjøllguten», som var ein ganske svaert båt, revolusjonerte trafikken i øvre Telemark. Den hadde heilt klart stor betyding. Med utvandringa til Amerika var det ein straum av folk som trong skyss, så båten kom i drift på grunn av eit etterspurd behov, seier Odd Vidar Rui.
Han viser til at utvandrarane ofte hadde med seg kiste på kiste, og da var det langt enklare å ta desse med seg på båten enn med hest.
Ifølgje Rui er det usikkert når forgjengaren «Snarken» blei etablert, men den var i drift i 1860åra og kanskje også på 1850-talet. Også den frakta mange utvandrarar frå ei bygd der svaert mange realiserte draumen om eit anna liv i Amerika.
Opp og ned
Aksjekapitalen i «Fjøllguten» lydde på 5.000 spesidalar, eller rundt 20.000 kroner. Kvar aksje var på 25 spesidalar. Ei tid skal det ha gått så dårleg økonomisk at mange bytte bort aksjane eller lutbreva som dei kalla dei i øvre Telemark - i ein tobakksrull. Seinare kom det oppgangstider. og den økonomiske situasjonen vart langt meir lysteleg. Eitt år vart det delt ut 100 prosent utbytte, snakk om gulltid.
«Fjøllguten» var passasjerskip fram til 1924, i nesten 50 år. Da overtok Seljord Billag persontrafikken, og det kan nemnast at nettopp «Fjøllguten» var ein av dei største aksjonaerane i dette billaget ved starten. Olav Tufte var den fyrste kapteinen - frå 1876-1883. Deretter overtok