Fekk verdfull kunstgåve
Bø kommune har fått ei verdfull samling av den lokale kunstforeininga. Den er forsikra for 300.000 kroner.
Bø Kunstforening er oppløyst, og i samband med dette har laget skjenka samlinga på 36 kunstverk til Bø kommune.
Den siste leiaren i laget, Torhild Aavik, stod for overrekkinga under kommunestyremøtet måndag kveld. Samlinga består av mest bilete.
Også pengegåve
Blant kunstverka er blant anna eit broderi av fjelltoppen Jørånnatten på Lifjell, laga av Molla Lahus. Det blei kjøpt inn i 1980 for 13.500 kroner. Gunnulf Staurheim er òg representert med mange bilete i samlinga. Samla innkjøpsverdi er vel 157.000 kroner.
Kunstforeininga i Bø vart skipa i 1980, etter initiativ av Hans Otto Waaraas. Ifølgje vedtektene skal samlinga, ved oppløysing av laget, gå til kommunen. Det er det som no skjer. Med på lasset følgjer også ein bankkonto på 48.000 kroner.
– Det var for tre år sidan at laget vedtok oppløysinga. Ifølgje vedtektene skulle kontoen vere sperra i tre år, og no er den tida ute. Derfor får kommunen gåva no i 2017, opplyser Torhild Aavik til Varden.
Orka ikkje meir
Ho fortel vidare at styret ikkje såg det mogleg å halde på vidare, da arbeidet krev mykje dugnadsinnsats.
– Me var ikkje lenger motiverte for denne dugnadsjobben. seier ho. – Vemodig at det no er slutt? – Vedtaket var ein lette, men også vemodig, svarar Torhild Aavik.