Forsvarer tomme senger på sjukeheim

To senger har stått tomme på Bø sjukeheim i lang tid. Kommunen finn det meir lønnsamt å leige plassar i Kviteseid.

– Den økonomiske verknaden på årsbasis blir gunstigare ved å leige enn å tilsetje nye medarbeidarar for å bemanne desse to sengene. I Kviteseid betalar kommunen 2.000 - 2.500 kroner per døgn. For tida har me fire pasientar der oppe, andre gonger er det ingen, seier kommunalsjef for helse og velferd i Bø kommune, Terje Kili.

Vil ta i bruk

Han opplyser at leigeutgiftene i Kviteseid er halv pris kontra å ha eigne pasientar på sjukehus. Der er døgnprisen 4.300 kroner. Kili, som også er assisterande rådmann i Bø kommune, seier at målet er å ta i bruk dei to sengene på korttidsavdelinga i 2018.

– Me vil gjerne bruke dei to sengene i ordinaer drift, men dette avgjer politikarane ved budsjetthandsaminga. Dette handlar om pengar. Det eine ledige rommet på Bø sjukeheim blir teke i bruk viss det oppstår akutt manko på plassar. Totalt har Bø kommune ni plassar på korttidsavdelinga, og sju av desse er i bruk i dag, seier Kili vidare.

Leiger ut til naboane

På den andre sida leiger Bø kommune ut seks langtidsplassar til nabokommunane - fordelt med fire på Nome og to i Sauherad.

– Kvar plass gjev oss inntekter på 950.000 kroner. Desse kronene er viktige for finansieringa av drifta på Bø sjukeheim. På årsbasis medfører dette ei inntekt på 5,4 millionar kroner. Dette opplegget gjev oss også større fleksibilitet med fleire medarbeidarar som er med på å høgde den interne kompetansen ved sjukeheimen. For brukarane frå Bø er dette ein fordel, opplyser Kili. Han seier at Nome har sagt opp to av plassane frå nyttår - slik at Bø deretter har fire utleigesenger på langtidsavdelinga. Ifølgje Kili legg kommunen opp til at Bø skal nytte desse plassane sjølve.

Bø har 42 ordinaere sjukeheimsplassar pluss 21 plassar på demensavdelinga - totalt 63 sjukeheimsplassar.

Fire personar har fått vedtak om langtidsplass. Desse ligg for tida på korttidsavdelinga inntil det blir ledige plassar på langtidsavdelinga. Han seier at einskilde heimebuande har besøk av sjukepleiarar opptil ti gonger dagleg, og at det heile tida er ei vurdering av desse pasientane

Alt mot lønn

Kommunalsjefen legg ikkje skjul på at at det er manko på pengar som er årsaka til situasjonen med ubrukte senger.

– Forstår du at folk reagerer på dette etter lønnshoppa for leiarane i kommunen?

– Alt me driv med kan målast opp mot lønna til tilsette i kommunen, svarar Terje Kili.

VIL GJERNE: Assisterande rådmann Terje Kili seier at Bø kommune har bruka 680.000 kroner på å leige senger andre stader hittil i år. Han seier at kommunen gjerne vil ta i bruk dei to ledige romma på sjukeheimen.