Vil auke skatt på fritidshus
Hyttefolket i Hjartdal må førebu seg på høgare eigedomsskatt. Kommunen har 2.300 fritidsbustader.
Det går fram av forslaget til årsbudsjett som rådmann Rune Engehult har lagt fram.
– I tråd med vedteken økonomiplan er det i konsekvensjustert budsjett lagt opp til å auke eigedomsskatten på fritidshus frå 4,9 til 5,9 promille, skriv rådmannen i saksutgreiinga.
Hjartdal har i dag 2.300 hytter. Det er hytter i alle delar av kommunen, men Tuddal har flest fritidsbustader.
Trong økonomi
Rådmannen opplyser til Varden at det er ein krevjande økonomisk situasjon.
– Det er ingen vekst i skatt og rammeoverføringar frå 2017 til 2018. Låge kraftprisar gir liten inntekter og regjeringa foreslår endringar som inneber at kommunen ikkje lenger vil få eigedomsskatt frå linenett, opplyser rådmannen.
Han skriv at Hjartdal kom ut som ein tapar da statsbudsjettet for 2018 vart lagt fram tidlegare i denne månaden.
Hard lut
Han nemner vidare at stopp i mottak av flyktningar gir stopp i integreringstilskot og at Hjartdal har nedgang i folketalet.
– Summen av dette gjer det nødvendig med omfattande tiltak for å få økonomien i balanse, understrekar rådmann Rune Engehult.
Han foreslår elles å auke gebyr og betalingssatsar innanfor oppvekst og helse/omsorg med fem prosent. Rune Engehult viser til at Hjartdal har lågare betalingssatsar enn samanliknbare kommunar.