Velfortent pris til Anne
Denne veka fekk NRK Telemark sin journalist Anne Lognvik Kringkastingsprisen. Prisen har blitt delt ut sidan 1978 og går til ein person som har utmerkt seg med eit god mediespråk i radio eller fjernsyn og som på ein framifrå måte nyttar nynorsk eller dialekt i det daglege arbeidet.
Juryen trekk fram i grunngjevinga si at Lognvik med sin støe nynorsk og trygge raulandsdialekt har ført det norske språkmangfaldet til mange heimar i Telemark og i Noreg. Styreleiar i Kringkastingsringen, Guro Kvalnes, kallar Lognvik «eit språkleg førebilete» og meiner ho har synt at dialekten hennar og nynorsk er mediespråk som høver i alle samanhengar, Kvalnes meiner at Lognvik er med på å styrke dialekttryggleiken i Telemark.
Det er ikkje tvil om at prisen er velfortent. Anne Lognvik er for mange sjølve stemma frå Telemark og det er utruleg mange som har hatt gleda av å høyre henne i fleire tusen reportasjar på radio og TV gjennom mange år. Lognvik har brukt dialekten frå Rauland konsekvent og sjølv om det alltid er folk som har meiningar om bruken av dialekt på radio, har Lognvik alltid stått støtt i bruken av raulandsmålet.
Lognvik har sidan åttitalet jobba i NRK Telemark og gjennom denne tida har ho arbeidd på kontora i Seljord og Porsgrunn, samt vore distriktsredaktør i NRK Telemark. Ho er ein saers dugelegjournalist som kan faget sitt, men samtidig er ho sjølve stemma frå Telemark. Vi gratulerer med prisen og håper det blir mange år til med reportasjar og nyheiter frå heile fylket vårt.