Dette er heltane ved Seljordsvatnet
Dei brukar timevis av både kvardag og helg for å hjelpe andre i nød.
– Veldig hyggjeleg med påskjøninga, men denne kringla vil me gjerne dele med resten av leitemannskapa i Telemark. Det er forresten blitt meir vanleg at korpsa i fylket hjelper kvarandre ved aksjonar, seier Kenneth Haugland og resten av den flotte gjengen i Seljord Røde Kors.
Dramaet på vatnet
Eit lag som forresten akkurat har runda 70 år, og som i 2018 kan feire 30 år i eit solid bygg i hovudsak ført opp på dugnad det også.
Det er Solveig Brekke i Bø som meiner at redningsmannskapa fortener julekringle frå Varden, etter den dramatiske ulykka på Seljordsvatnet torsdag 12. oktober. Ein laerar og to flyktningelevar omkom i den ufattelege tragedien.
Eigen sekk klar
Klokka 14.15 denne skjebnesvangre torsdagen gjekk alarmen om at tre menneske var sakna etter båtvelt på Seljordsvatnet. I løpet av dei fire dagane deltok Seljord Røde Kors med eit mannskap på 28 som igjen la ned 314 dugnadstimar for å finne dei tre sakna.
– I ein slik situasjon tenkjer ein på å hjelpe og leite. Når ein køyrer til åstaden, er det greitt å tenkje litt på kva som kan vere den verst tenkjelege utgangen. Under aksjonen går det på autopilot. Nøkkelen er å kjenne sine sterke og svake sider og bruke folk på det dei er gode til, seier John Olav Haugetuft og med- spelarane hans. Dei har alle ein eigen redningssekk ståande klar for utrykking.
– Det spesielle denne gongen var dei tre menneske som låg i vatnet. Da står det om minutt og sekund. Vanlegvis har me langt betre tid, legg veteranen Geir Venås til.
Med i 53 år
Han har fartstid i Seljord Røde Kors sidan 1964 og kan - saman med resten av gjengen rundt bordet - fortelje om stort engasjement og eit godt sosialt miljø. Dei aktive medlemmene er frå 22-70 år.
Midt under aksjonen på Seljordsvatnet måtte dei også sende ei patrulje til Skorvefjell, etter to sakna personar.
– Det er stor vilje til å stå på, enten det er laurdagskveld eller ein kvardag. Og arbeidsgjevarane våre viser stor forståing for å gje fri for denne dugnadsinnsatsen, seier karane i eit lag som kan skilte med god økonomi.
Kvar onsdagskveld er dei på plass i den flotte garasjen i Seljord sentrum for blant anna å klargjere og vedlikehalde utstyret til nesten gong alarmen går.