Fekk ny veg til 25 millionar
Bygda la 100.000 kroner i potten og fekk ny veg til 25 millionar kroner. Utan Tove Gulliksen Øy ville prosjektet ikkje blitt realisert.
Bygda la 100.000 kroner i potten og fekk ny, flott g/sveg til 25 millionar kroner. Kampen har halde på i rundt 40 år. Torsdag blei prosjektet i Vrådal offisielt opna.
Det var den klare meldinga da den nye gang. og sykkelvegen på 750 meter frå Vrådal sentrum til Straumsnes (i retning Vråliosen) vart offisielt opna av fylkesordførar Sven Tore Løkslid torsdag ettermiddag. Det var stor festivitas i bygda med bra frammøtte, deriblant mange barn.
– Ein stor dag, seier hovudpersonen Tove Gulliksen Øy som klipte snora saman med fylkesordføraren.
På vegner av velforeininga har Gulliksen Øy skrive brev og kjempa for anlegget.
Det høyrer vidare med at no arbeider den aktive vrådølen med å få g/s-veg frå Straand Hotell og sørover.
Mange godord
– Denne strekninga me opnar i dag bør heite Toves veg. Utan henne ville ikkje vegen ha kome. Ei dame med bein i nasen, sa Terje Nekstad frå Vrådal idrettslag da han takka eldsjela.
Ho fekk gåve frå idrettslaget samt blomar og godord frå bygdas ordførar Tarjei Gjelstad.
Han la heller ikkje skjul på at bygda kan takke Tove for denne vegen. Ordføraren sa elles at det var ein stor dag for kommunen.
Kamp i 40 år
Vegen kom etter at bygdefolk i rundt 40 år har kjempa for prosjektet, som no kjem både innbyggjarane, reiselivet og hyttefolket til gode.
Vrådal idrettslag og Vrådal Vel bladde opp 50.000 kroner kvar, og kontakta Berge Skårdal i Vest-Telemark Naeringsutvikling for å jobbe vidare med prosjektet.
Edvard Straumsnes har vore byggjeleiar for g/s-vegen der arbeidet er utført av Skorve Entreprenør A/S.
– Her var det ein dårleg og smal veg tidlegare. Kring 1.600 meter med mur er bruka for å realisere vegen som er blitt bygd på eitt år. Asfalteringa var ferdig i slutten av oktober og prislappen ligg litt under budsjett. Arbeidet har gått etter planen, seier Edvard Straumsnes.
Vegsjefen i Telemark, Tore Kaurin, viste til at vegvesenet har hatt godt samarbeid med kommunen.
Han var saerleg glad for at ingen personar er blitt skadd i anleggsperioden.