Bare å spenne skiene i helga
Skientusiastane kan fryde seg. Det er supre forhold i øvre Telemark i både løyper og bakkar.
Det meldes om glitrende forhold i øvre Telemark.
I Rauland er det no 12-13 mil med oppkøyrde langrennsløyper. Det opplyser driftsleiar ved Rauland Skisenter, Stein Birger Johnsen, til Varden. Han lokkar med flotte forhold i helga.
– Den store runden blei køyrt torsdag og maskinene skal ut igjen natt til laurdag og laurdag morgon. Me har ikkje køyrt inn til Holtardalen på grunn av ein bekk, men der blir det snart lagt ned rør, opplyser Johnsen.
Johnsen seier at det har kome 5-6 cm med snø etter mildvêret for to veker sidan. I terrenget er det no kring ein halv meter med snø.
Mange heisar
Kristin Larsen på Vierli seier at ho har tre heisar opne der oppe og fire ved Rauland Skisenter. I tillegg er Raulandsfjell Alpinsenter ope.
– Det er supre forhold i bakkar og løyper, seier den fornøgde fjelldronninga på Vierli.
På Skafsåheia er det gode skiløyper i helgene, opplyser Peter Olsson ved Hallbjønnsekken Høyfjellssenter. Han håpar på at alpinbakken kan opnast fyrste joledag.
Ope i Vrådal
Petter Johnsen ved Vrådal skisenter har 10 av 18 bakkar opne.
– Flotte forhold, men for langrenn er det ikkje noko å skryte av enno, seier Petter Johnsen.
Ope på Gautefall
Bjørn Halvor Roalstad på Gautefall skisenter seier at dei har tre bakkar opne i helga.
– Dei to lange bakkane er preparerte og ekspressheisen går. Me har ein kombinasjon av kunstsnø og naturleg nedbør, seier han.
Derfor bør det vere duka for ei flott helg også på Gautefall. På skiskyttararenaen er det gode langrennsforhold i løypa på fem kilometer. Elles i terrenget er det enno for lite snø til oppkøyring av løyper.
Svanstul
Det er òg situasjonen på Svanstul. Det melder Svanstul Utvikling på nettet fredag. Kari Mette Lørdahl seier til Varden at løypekøyrarane er klare straks det kjem nok nedbør.