VIL KRF LEGGE NED FYRESDAL FENGSEL?

Varden hadde nyleg reportasje om ein 57 år gammal sørlending som endeleg hadde fått skikk på livet sitt etter eit opphald ved det opne fengselet i Fyresdal. God hjelp til dette hadde han fått både av personalet og av bygdefolk som stadig stiller opp for fangane. Han sjølv var ikkje religiøs, men hadde fått så mykje støtte frå prostidiakonen og andre i kyrkjelyden at han, som takk for hjelpa, saman med sin muslimske medfange Nasser hadde teke på seg å vaske ned to kyrkjer i Fyresdal.

Det tradisjonsrike fengselet på Kleivgrend i Fyresdal utmerkar

seg med trivsel og gode resultat for dei innsette og har samtidig rimelege driftskostnader. Likevel fekk regjeringa med seg KrF og Venstre på ein merknad i revidert statsbudsjett om å legge ned fengselet når dei nye plassane i Froland og Evje står ferdige.

I Vest-Telemark har mange ei kjensle av at dei 28 soningsplassane i Fyresdal skulle ofrast i ein hestehandel for å få dei 40 nye opne plassane i Evje.

I sommar prøvde eg å få svar frå Kjell Ingolf Ropstad, då i justiskomitéen, om han ville arbeide for å oppretthalde fengselet i Fyresdal, men fekk berre til svar at saka ikkje var endeleg avgjort.

No når KrF har fått gjennom både laerarnorm og sukkeravgift, bør dei kunne ta seg tid til å vurdere fengselet i Fyresdal på nytt. Dette er viktig både for kriminalomsorga i Noreg og for 20 arbeidsplassar i den vesle utkantkommunen Fyresdal.

Resten av opposisjonen på Stortinget har alt lova å støtte fengselet, noko som tyder at KrF sitt standpunkt vil vere tunga på vektskåla. For dei har vel ikkje alt lova Høgre og Framstegspartiet å gå inn for nedlegging?

Kva meiner Telemark KrF?