Signerte ny Nav-avtale
Tre blide ordførarar signerte avtala om Nav-samarbeid i midtfylket.
– Ein stor dag, seier fylkesarbeidssjef Terje Tønnessen. Samarbeidet betyr at Bø blir vertskommune, men Nome beheld dagens kontor. Folk i Sauherad vil også få eit tilbod på Akkerhaugen.
Fjerde største
Den nye organisasjonen får totalt 38 tilsette - 17 av desse jobbar på Ulefoss.
– Nav Midt-Telemark blir det fjerde største kontoret i Telemark, på line med Notodden. Dette samarbeidet vil gje oss meir kraft og kompetanse. Samarbeidet i midtfylket kan utløyse diskusjonar om samarbeid andre stader, opplyser fylkesarbeidssjefen vidare.
Nome-ordførar Bjørg Tveito Lundefaret (Ap) seier at denne saka handlar om å finne dei gode løysingane.
Sikrar gode tilbod
– Dette er eit bra tiltak og eit godt grep. Dette sikrar eit godt tilbod til innbyggjarane, noko som er viktig, seier Nome-ordføraren.
Det var diskusjon i Nome kommunestyre tidlegare i haust, og ordføraren seier at det ikkje er stor vilje til å flytte alt til Bø. Ho viser til at det er viktig for ein kommune å behalde offentlege arbeidsplassar.
Kjem nedanfrå
Kollega Olav Kasland (V) smilte også breitt etter at avtala vart signert onsdag føremiddag.
– Ønsket om samarbeid kjem frå dei tilsette. Dette sikrar gode fagmiljø. I dag er det eit sårbart miljø, der det vert meir og meir spesialisering, seier Kasland.
Ordføraren seier at han sjølvsagt er fornøgd med at Bø får hovudkontoret. Ballen med samanslåing av Navkontora byrja å rulle da kommunane Bø og Sauherad valde å gå saman til ein kommune. Kasland viser elles til at samanslåinga av Notodden og Hjartdal for kring ti år sidan vart ein suksess.
Ordførar Mette Haugholt (Ap) i Sauherad seier at det no handlar om å kunne gje innbyggjarane dei gode tenestene.
– Eg trur dette vil fungere bra, seier ho.
Snart tilsetjing
Arbeidet med å finne ny sjef for Nav Midt-Telemark er i full gang. Terje Tønnessen seier at det er mange gode søkjarar, og at det vert ein ny intervjurunde 2. januar. Han håpar at tilsetjinga kan skje i løpet av januar 2018.
– Dette er ein viktig og krevjande jobb. For Nav er jobb nummer ein å få fleire ut i jobb. Me ønskjer oss meir kraft mot arbeidslivet. For ungdommen er det viktig å fullføre vidaregåande skule og få fagbrev. Elles er det mykje verre å få seg jobb, seier Terje Tønnessen.
Nav opplever kraftig nedgang i besøket på kontora sine, noko som blir forklart med at etaten har gode digitale og brukarretta løysingar. ▶