Hjelper folk i nød
Overskotet av romjulskonserten i Bø kyrkje går til folk i nød.
For andre året på rad arrangerer Ingrid Skåland Lia (20) og Sindre Bakkåker (21) konsert i Bø kyrkje. I år går arrangementet av stabelen torsdag 28. desember, eller fjerde dag jul. Inngangsbilletten er gratis, men det blir teke opp kollekt. Overskotet går til Kirkens Nødhjelp.
– Det er veldig moro å gjere dette, seier dei to blide arrangørane i ein prat med Varden.
Suksess
– Konserten i fjor gjekk veldig bra. Me hadde håpa på 50 menneske og så kom det 250. Overskotet blei på 15.700 kroner, fortel Sindre.
Både Ingrid og Sindre er studentar på Noregs musikkhøgskole. Dei kjenner kvarandre godt etter å ha spela i korps saman i mange år.
– No har det blitt betre førebuingar. I fjor var det knapt med tid, seier 21-åringen frå Bø.
Tilfeldig
Båe ungdommane har bakgrunn frå kristne heimar, men seier det er litt tilfeldig at overskotet går til Kirkens Nødhjelp. Dei ønskte å gjere noko for andre, og pengane går til den same organisasjonen i år.
På konserten fjerde juledag aktar dei å servere norsk tradisjonsmusikk, eit par salmar og amerikanske jazzslagerar. Sindre sjølv spelar på trommer, medan Ingrid både er solist og spelar saksofon.
Med seg på konserten har dei organist Rolf Axelsen Lie og Knut Eirik Hult, som både er solist og spelar bass. Helene Sele er solist medan Erik Norheim er gitarist. Audun Rørmark skal spele både hardingfele og fiolin.
Flott plass
Til arrangementet har dei fått låne Bø kyrkje gratis.
– Folk frå kyrkja stiller også opp for oss. Dette er ein utruleg fin konsertarena, så valet er lett. Me synest det er hyggjeleg å samlast i jula, seier Sindre.
I fjor kom det mykje ungdom ved sida familiar. Dei håpar sjølvsagt på god oppslutnad også i år. Dei har øva i Gullbring, men tredje og fjerde juledagen blir det å perfeksjonere seg vidare i kyrkja, før publikum set seg i den flotte kyrkja.
Ungdommane marknadsfører konserten via plakatar, den sosiale nettstaden Facebook og omtale i media
▶