Kostbart for e-verka
E-verka får svi økonomisk for dei mange straumbrota etter snøfallet.
▶ – Me har ingen full oversikt før om nokre dagar, men eg kan seie at dette heilt klart har kosta oss eit sekssifra beløp. Så dette har ikkje vore noko billeg moro, opplyser økonomisjef Jan Berge i Midt-Telemark Energi (MTE) til Varden.
Får «bot»
På den snøtunge dagen hadde fullt fokus på at folk skal få straumen tilbake. I løpet av vel eitt døgn var forsyninga normal til alle dei 1.045 abonnentane.
Berge seier at MTE får trekk i inntektsramma til NVE som følgje av straumbrotet. Dette blir kalla Kile-kostnader - kompensasjon for ikkje levert elektrisitet. Beløpet er ikkje klart.
– Vidare får me ekstra utgifter for overtid, nattarbeid og materiell som følgje av skadane. Totalt var det 25 personar i selskapet som jobba med problema. Straumbrotet medfører også redusert straumforbruk, utan at dette blir det heilt store inntektstapet, ifølgje økonomisjefen i MTE.
Må søkje om kompensasjon
Salssjef Berit Volleng Sanden i MTE opplyser at kundar som var utan straum i over tolv timar, får kompensasjon.
– Dei som var utan straum i mellom 12 og 24 timar har krav på 600 kroner. For dei som var straumlause i 24-48 timar er satsen 1.400 kroner. Ingen av våre abonnentar var utan straum i over 48 timar, men for 48-72 timar er kompensasjonen 2.700 kroner, opplyser salssjefen i energiverket.
– Kjem dette som straumrekninga? kutt i
– Kundane må aktivt søkje om dette sjølv. Det ligg skjema på nettsida vår. Dei som søkjer, og har krav på kompensasjon, får det aktuelle beløpet som reduksjon på fakturaen, svarar Berit Volleng Sanden.
Skagerak Energi har den same kompensasjonsordninga, går det fram av informasjon på nettsida deira.
Ikkje oversikt
Også kraftgiganten jobba på spreng for å få alle kundane på nett. I løpet av onsdag fekk stadig fleire straumen tilbake. Torsdag ettermiddag var kring 50 kundar i Grenland som var berørt av feil, men desse tala endrar seg frå time til time.
Da Varden var i kontakt med informasjonssjef Ruhne Nilssen i Skagerak, hadde han ikkje oversikt over dei økonomiske kostnadene for bedrifta som følgje av straumbrota.