«Havhest» alt i 1750
Sjøormen i Seljordsvatnet blei tidlegare kalla havhesten. Den fyrste kjende observasjonen er frå 1750.
▶ Steinar Fjøstuft fortel om dette til Halvor J. Sandsdalen i boka «Ormen i Seljordsvatnet» som kom ut i 1976.
Den eldste soga Fjøstuft kjende til, er frå 1750.
Pågåande dyr
Det året kjøpte Gunleik Anderson Verpe frå Bø eigedommen Nes på Garvikstrondi.
– Da han flytta til Nes, rodde han to prammar opp vatnet frå Ulveneset. Den eine prammen hadde han på slep. Oppe i fjorden møtte han ein havhest, og han var så pågåande at han velta fyrste prammen. Etter den tid var det lenge at folk som skulle ro over vatnet, hadde med eitt eller anna til å verje seg med, skriv Halvor J. Sandsdalen i boka som kom i ny og utvida drakt kring 15 år seinare.
Mystiske ulykker
Drukningsulykker i vatnet har også blitt knytt til dette mystiske dyret. Kring 1850 for ein skreppekar med namnet Aslak Qvisli forbi Seljord. Ein kveld kom han til Odden og ville bli rodd over til Manheimstrondi, men husbonden der nekta fordi det var så seint på kvelden.
Da dukka det opp to gutar, den eine heitte Jens Urbøen. Dei baud seg til å ro Aslak over. Det enda fatalt. Anne Sliremyr høyrde naudropa, og litt etter kom to dyvåte gutar til land. Dei fortalde at båten hadde velta og at Aslak Qvisli hadde drukna. Gutane hadde berga seg med ein brennevinsdunk. Det vart sokna lenge etter mannen, også med såkalla «runekross», men utan resultat.
I 1892 forsvann Olav Dalan på Garvikstrondi. Han kom frå Bø etter ein gardshandel, og var på heimveg. Seint på kvelden vart han sett i austenden av vatnet, men sidan var seljordingen søkk borte. Det blei bruka manngard, sokning og ein synsk mann vart kontakta, men utan resultat.
Lensmannen undersøkte
Både i eldre og nyare tid har ei rad pålitelege folk «sett noko» på vatnet.
I 1914 undersøkte stortingsmann og lensmann Olaf Sveinsson observasjonane om dyret. Sonen Svein Sveinsson, også lensmann, skriv om dette i ein artikkel frå 1962. Ein av mennene som såg «dyret» var den gamle kapteinen på passjerbåten «Fjøllguten», Hans Klokkarstugo. Han såg hals og hovud over vatnet, ifølgje undersøkinga til lensmannen.
I den kom det òg fram at Olav Nøsthaug rodde beint på dyret, så prammen nesten velta. Det var berre så vidt han kom seg i land ved Heggeneset. Dette var same året, og på om lag same plassen som Hans Klokkarstogo gjorde observasjonen sin, ifølgje boka til Sandsdalen.
Mange observasjonar
Sidan har ei rad menneske gjort observasjonar, deriblant Torje Lindstøl da han køyrde tømmer i 1963.
I tørkesomrane 1976 og 1977 var det fleire som såg ormen. Daverande stortingsrepresentant Arne Kielland (SV) frå Bø bad derfor i 1977 miljøvernminister Gro Harlem Brundtland om å gjere undersøkingar.
I juli 1983 såg sivilagronom Halvor Øygarden frå Vinje eit stort dyr som brått kom opp frå vatnet. Han var interessert i å skipe ei vitskapleg gruppe for å sjekke fenomenet.
Sidan har menn både frå Sørlandet og Sverige vore på farten med blant anna kamera under vatnet, men den snart 270 år gamle gåta er framleis ikkje løyst.
▶ Halvor Ulvenes KJELDER: Varden, Halvor J. Sandsalen: Ormen i Seljordsvatnet, Halvor J. Sandsdalen: Seljordsormen