«Predikanten» slo an
Oterholtrevyen i Bø hadde det meste frå heimebrenning til religiøs vekking.
Fredag kveld var det premiere på den årvisse grenderevyen, som går på rundgang mellom dei ulike krinsane i bygda. I år var det grendelaget på Oterholt sin tur - og dei dyktige amatørane innfridde forventningane.
Imponerande scene
Dei vel 40 aktørane - med regissør Stein Arne Fossheim i spissen - varta opp med ei imponerande scene. I bygda blei staden på nordsida av Bøelva tidlegare kalla Tatergata. Derfor hadde gjengen ført opp ei flott husmannsstove i tømmer - med solid gamaldags tilbehøyr rundt huset som blei kalla Taterstugo.
Fødd skodespelar
Ein av skodespelarane som briljerte på den scena fredag kveld var Gunnar Maeland. Drivaren av Circle K i Bøgata kan meir enn å selje bensin. Gregar O. Sudnuten, som han kallar seg, var utsendt journalist - eller bladfyk om ein vil - frå VestTelemark Blad. I Bø var han på jakt etter lokalavisa der, for å få full kontroll.
Litt seinare i revyen var han òg på farten og spela den no pensjonerte handelsbetjenten Torvald Amundsen på Sønstebøtunet - mannen som alle vil handle med. Med sin imitasjon tok han Torvald på kornet, til stor glede for publikum.
Religiøs vekking
Varden måtte gå før andre akt var over, men opningsnummeret med religiøs vekking etter pause var eit innslag som mora publikum stort. Geir Tore Vreim var ein framifrå predikant, og soknebarna assisterte med flott musikk. Dette nummeret fekk klappsalve etter klappsalve.
Konklusjonen i nummeret var at Oterholt blir det nye senteret i Midt-Telemark kommune, og der blir det slett ingen tilgang for ulefossingar.
Gregar Høydal la fram ein fersk rapport frå bygdas forskingsinstitusjon - og konkluderte med at urbøheringen var temmeleg lik dei som bur i bygda i dag. Prøver av skjeletta viste at dei var like fuktige som dagens bygdefolk.
Hønepraten
I hønepraten kom det fram at det heller ikkje for damene er lett å kome langt oppi åra.
Elles gjorde den dyktige revygjengen stas på Halvor P. Skoe, som driv grendesaga på Vreimsida. Han fekk foto av eit flott saghjul som premie. Revyen som samla nesten full sal, eller over 380 personar.