Planlegger 400 nye hytter i Vrådal
Den vesle bygda kan få milliardsatsing på hytter og andre fritidsbustader.
Det er det nystifta selskapet Vrådalsfjellet AS som har planar om 400 - 500 hytter i Vrådal. Selskapet har overteke opsjonane til Vrådal Panorama og Petter Johnsen på hyttetomter i området. Det var Vest-Telemark Blad som fyrst fortalde om planane.
25-30 hytter i året
Frå før har dette området i Vrådal 400 hytter, så dei nye planane betyr ei dobling. Dagleg leiar i Vrådalsfjellet AS, Frode Flåm, opplyser til Varden at intensjonen er å føre opp 25-30 hytter i 2018.
– Så får me sjå kva dei neste åra bringar, seier han. Flåm reknar med at kvar hytte vil koste kring 3,5 - 4 millionar kroner, og med 500 hytter blir dette raskt investeringar på 1,5 til to milliardar kroner over nokre år.
– Me er opptekne av i størst mogleg grad å nytte lokale aktørar, legg Flåm til.
Står bak
Aksjeselskapet Solrikt AS eig utbyggingsselskapet Vrådalsfjellet. Solrikt er igjen eigd av Dema Eiendom AS med 50 prosent. Frode Flåm har halvparten av aksjane i Dema og den andre parten der høyrer til Mads Nordnes.
Selskapet Virvelvind AS er den andre eigaren av Solrikt. I dette selskapet er Per Tore Teksum og Andreas Wiik aksjonaerar. Teksum har drive i eigedomsbransjen i 20 år, og har ført opp kring 150.000 kvadratmeter med naeringsareal og bustader i løpet av desse åra. Han har det solide selskapet Skarpsno som konsernselskap - eit firma som dei siste åra har hatt finansinntekter på fleire titals millionar kroner.
Ifølgje Frode Flåm er det Teksum som er det finansielle muskelen i satsinga i Telemark.
Ny campingplass
Frode Flåm, som har sitt eige byggmeisterfirma, seier at Vrådal har fleire turistar om sommaren enn vinteren. No planlegg Vrådalsfjellet AS 200-400 faste plassar for campingvogner. Han viser til at dette er i vinden. Leilegheiter på høgfjellet er også ein del av planane.
Flåm seier at dei har hand om rundt 50 hyttetomter på høgfjellet, men at det er viktig å ha tilbod både oppe i fjellet og nede ved alpinanlegget og kafeen.
Tyske og nederlandske borgarar er ein del av målgruppa som hyttekjøpa rar. Deiser Telemark som eit sikkert reisemål.
▶ Halvor Ulvenes halvor.ulvenes@varden.no