Den nye kommunen kan tape ti millionar
Midt-Telemark kommune kan tape ti millionar kroner årleg på at krinsane Hjuksebø og Angard forsvinn til Notodden.
▶ Det kom fram da ordførar Olav Kasland orienterte formannskapet om dei økonomiske konsekvensane ved deling av Sauherad.
Formannskapet i Bø tilrår elles kommunestyret om å slutte seg til vedtaket i Sauherad om dei to krinsane går til Notodden.
Bø-ordføraren understrekar at det er stor usikkerheit rundt dei økonomiske konsekvensane, men at den nye kommunen kan kome til å tape kring ti millionar kroner år på delinga.
Kommunen vil tape frie inntekter frå staten på kring 18 millionar kroner. I tillegg kjem bortfall av eigedomsskatt, som rådmann Åse Egeland har kalkulert til rundt ein million kroner i året.
Lågare kostnader
På den andre sida vil ein mindre kommune også bety lågare kostnader.
For skule- og barnehagesektoren er talet kalkulert til om lag fire millionar kroner.
Helse- og omsorgssektoren kan få bortfall av kostnader, eller frigjering av kapasitet, tilsvarande fem til sju millionar kroner.
Rådmann Åse Egeland skriv at innanfor helse- og omsorg vil ein ikkje kunne redusere årsverk direkte i tenesta.
– Eit bortfall av tenestebehov vil gje ledig kapasitet som kan disponerast. Tek ein omsyn at det blir fleire eldre framover, oppstår det nye behov tilsvarande reduksjon knytt til grensejustering. Dette betyr mindre behov for auka rammer framover, skriv rådmann Åse Egeland.
Innanfor området plan, teknikk og naering kan dei årlege kostnadene bli redusert med 1,7 millionar kroner.
Følgjer innbyggjarane
Varaordførar Borgar Torbjørn Kaasa (Sp) stilte spørsmål om ikkje staten burde kompensere for tapet.
Ordførar Olav Kasland svara at dette er eit nullsumspel, der inntektene følgjer innbyggjarane.
Han ser det som lite truleg at staten kompenserer for dette. Kasland viste òg til at staten alt har bladd opp 20 millionar kroner i reformtilskot i samband med at Bø og Sauherad går saman til ein kommune frå 2020.
▶ Halvor Ulvenes