Arvid er den nye sjefen
To partilag blei oppløyste. Arvid Hagen vart ny leiar i den nye organisasjonen.
▶ Onsdag kveld blei historisk i midtfylket. Da blei både Bø Ap og Sauherad Ap lagt ned og i staden oppstod Midt-Telemark Arbeiderparti. Dette har naturlegvis samanheng med at dei to kommunane blir slegne saman frå 1. januar 2020.
Bø Arbeiderparti har ei historie på 127 år, stifta i 1891, medan nabolaget vart 94 år - etablert i 1924, får Varden opplyst.
Ny sjef
Tidlegare leiar i Bø Ap, Arvid Hagen, skal også leie den nye organisasjonen vidare. Bjørg Hesthag frå Sauherad blei nestleiar, Kari Vala, Bø, kasserar og Hans Sundsvalen, Sauherad ny sekretaer. Karin Hagen, Bø, blei valt som ny studieleiar, Mari Anne Jensseter er kvinnekontakt og Jon Halvor Svalbjørg fagleg politisk kontakt. Arne Storhaug og Inger Marie Dahl vart valte som styremedlemmer.
Dette betyr at dei mangeårige ordførarane Hans Sundsvalen og Arne Storhaug båe er ein del av det nye styret.
Kjempegod stemning
Den nye organisasjonen har 156 medlemmer - fordelt på 93 i Bø og 63 i Sauherad. På årsmøtet kom det 38 medlemmer.
– Det var kjempegod stemning. Målet vårt er å runde 200 medlemmer i løpet av to år, seier den nyvalde partileiaren i ein prat med Varden etter årsmøtet.
Han understrekar at den store oppgåva for det nye partilaget blir å overta makta i den nye kommunen om snaue to år.
Godt i gang
Arvid Hagen opplyser vidare at partiet er godt i gang med nominasjonsarbeidet. Han er leiar av nominasjonskomiteen, og seier at det har vore lett å få med folk.
– Det nye partiet må ha minst 30 namn på lista og maksimalt 36 nominerte. Me har tilstrekkeleg med kandidatar, og derfor får nominasjonskomiteen kvile fram til hausten, fortel Arvid Hagen.
Hagen seier at det så langt ikkje er avklart om rekkefølgja på vallista.
Nye namn
Han opplyser at partiet har fått ein del unge og spennande namn som er viljuge til å stå på lista, deriblant unge kvinner tidleg i 30-åra. To av desse, Karin Hagen og Inger Marie Dahl, er no på kurset «20 kvinner på topp» i regi av Ap sentralt. Merete Kastet frå Sauherad er også med på dette kurset. I båe kommunane har Arbeiderpartiet rike tradisjonar. I Bø sat partiet med ordføraren samanhengande frå 1983-2011, dvs. i 28 år eller sju periodar.
På slutten av den siste perioden var det masse bråk i Bø Ap, og i 2011 fekk Venstre igjen ordføraren - med Olav Kasland som no svingar klubba i sin andre periode.
Det står att å sjå om Midt-Telemark Ap klarer å vippe Olav Kasland ut av ordførarstolen neste haust.
▶ Halvor Ulvenes