Halvor - ein aktiv tusenkunstnar
Han har halde på med rosemåling i kring 45 år. No skal Halvor Bentsen arrangere nytt kurs i faget.
Det skjer på Kviteseid skule fyrste helga i mars.
– Eg har fått fleire oppfordringar, og derfor arrangerer eg kurset. Der kan eg ha inntil åtte elevar, seier Halvor Bentsen (60) som starta med rosemåling i tidlege tenår.
«H. Bentsen Brukskunst» lyser det på skiltet i Dalanevegen i Kviteseid. Bak det 35 år gamle firmanamnet skjuler det seg ei interessant og spennande verksemd som omfattar langt meir enn rosemåling.
Utdanna tømrar
Han lagar naturbilete, ofte landskapsmotiv. I arbeidet brukar han naturen - strå, konglar og ormegras for å utføre kunstverka sine. I mange år køyrde han rundt til forretningar som selde produkta sine. No går det meir på direkte sal av varene, sidan handelsbransjen har endra seg kraftig.
Kviteseid-mannen er utdanna tømrar, og jobba med dette som levebrød i ein tiårsperiode - frå 2002 til 2012.
Målar kjøkken
No er det igjen handverksarbeid som tek mykje av tida. Gudmund Kyrkjebø i Skafså lagar kjøkken, og Halvor har oppdraget med å måle ein del av desse - da med dei fargane som kunden måtte ønskje. I tillegg er han vikar for Telemark Bilruter, etter at han sikra seg busslappen i fjor. Gjennom åra har han hatt mange ulike oppdrag. Da Agderposten - som no eig Varden - jubilerte i 1999, fekk Halvor jobben med å lage 125 eksemplar av avisguten. Svigerfaren hans, Simon D. Larsen, laga prototypen medan Halvor stod for produksjonen.
– Det var ein stor jobb, fortel han.
Ei veke i året dreg han til storsenteret i Sortland, der han målar og teiknar det kundane måtte ønskje. Ei av dei morosame oppgåvene der var å måle eit naturmotiv på eit kvalbein.
«Guds gåve»
Handverkaren, som har kunstnarblod i årene, seier at han alt som barn var veldig glad i å teikne.
– Dette er ei Guds gåve, seier Halvor, som er aktiv i pinserørsla.
Verkstaden hans er pryda på bokstavane «Jesus lever» - eit klart prov på at barnetrua står fast hjå den blide og imøtekomande kunstnaren.