Det gode hundeli
Ekteparet Ann Kristin og Svein Magne Myklebust gjekk mot straumen da dei flytta frå Arabygdi til Tjønndalen, naer grensa til Edland.
Der driv dei i dag turistbedrifta Haukeli Husky med 47 bikkjer (Alaska Husky). Forretningsideen er å skaffe turistar frå inn- og utland opplevingar i fjellheimen sommar som vinter.
Paret frå Kvinnherad kom til Vinje i 1995 da Ann Kristin fekk laerarjobb. Den gongen leigde dei hus av kommunen i Arabygdi.
– Dit var det hyggjeleg å kome. Me har alltid vore glade i friluftsliv og var heile tida på leit etter vinteren.
Svein Magne har gjennom mange år vore vaktmeister på Haukeliseter fjellstove. Der har han framleis full stilling, frå 1. mai til 1. november. Han har elles fartstid frå Nordsjøen og ulike jobbar innan barnevern.
Starta med ein schaefer
Ekteparet er svaert glade i dyr. Dei starta med ein schaefer, men besetninga har auka kraftig i løpet av desse åra i Vinje.
I Arabygdi hadde paret seks Alaska Husky. Dei legg ikkje skjul på at dette var litt stress på grunn av uling frå hundane og frykt for at bikkjene skulle slite seg i ei bygd med stort geitehald.
– Det gjekk likevel veldig fint, konstaterer paret som har to barn - Silje (25) og Sindre (19).
I siste del av 90-åra fekk dei kjøpt ei tomt i Tjønndalen, få kilometer frå Arabygdi, naer 900 meter over havet. Der sette dei opp eit tømmerhus, med innflytting i jola 1999.
– Det var eit stort steg å flytte dit. Me hadde gode naboar nede i bygda, seier paret som likevel trivst godt i Tjønndalen der dei i dag er utan grannar.
Hausten 2016 fekk dei nemleg kjøpt garden på 1.700 dekar som tomta deira er skilt ut frå. Ann Kristin og Svein Magne seier at det har blitt eit oppsving for bedrifta dei siste tre-fire åra. Haukeli Husky har fleire faste kundar, deriblant Seljord folkehøgskule, Sagavoll folkehøgskule, Sauda vidaregåande skule og Barnas Turlag ved DNT Stavanger. Sistnemnde har vore med frå starten.
– Det er venteliste i Stavanger for å kome hit - bra for oss.
Haukeli Husky har vidare ei rad turistar frå inn- og utland. I starten var det mest tyskarar, hollendarar og danskar, men etter kvart er det blitt mange nordmenn som ønskjer slike opplevingar i fjellet.
Køyrer sjølv
I denne delen av Vinje får dei prøve hundespann året rundt. Kundane får køyre sitt eige hundespann med topptrente hundar - fem eller seks bikkjer i front. Dei kan velje mellom dagsturar, halvdagstur og rundtur. Sistnemnde gjev ein smakebit av hundekøyring. På dei to fyrstnemnde er det innlagt matservering.
I tillegg byr dei på overnatting både i hus og hytter. På fjellgarden som dei kjøpte - og som ligg rett ved kennelen - er det gardshus, kårhus, låve og eit eldhus. Der byr dei på overnatting og tradisjonell norsk frukost. Haukeli Husky har dessutan ei fjellhytte på garden som gjestene kan leige.
Stor vekt på tryggleik
Det er til tider barskt vêr i Tjønndalen.
– Førebels har me sloppe å avlyse arrangement på grunn av vêret. Det er fascinerande med uvêr - regn er det verste. Bikkjene liker seg best vinterstid når det er 10-15 kuldegrader. Hundane er trygge og dei slåst lite. Me har fått mykje skryt for at hundane er sosiale og trygge. Dei fleste er nokre store koseklumpar, fortel Ann Kristin og Svein Magne Myklebust.
Dei seier at dei legg stor vekt på instruksjon og tryggleik før utfluktene. Dei har inga aldersgrense, men barn under seks år går gratis. No har også firmaet fått eit flott garderobebygg, med plass for både bobledressar og skotøy som passar til bruk i fjellet.
Om sommaren dreg hundane vogner med turistar både på Songavegen og Gravdalsvegen.
– Sommartrafikken har auka dei siste åra, konstaterer paret.
Firmaet har nådd millionomsetning.
– Me har til mat på bordet. Det er greitt. Krava våre er ikkje så høge, avsluttar paret.