Oppsving for Ivar
Lysta til å stå på ski førte Ivar Magnesen frå Sandefjord til Raulandsgrend. No frydar han seg over den flotte vinteren.
Det var i 2004 at han kjøpte alpinanlegget og restauranten i Raulandsgrend av tobakksfirmaet Gunnar Stenberg AS. Sidan har vestfoldingen drive denne bedrifta. Han har bustadadresse i Vestfold,men med leilegheit i hotellet er han svaert mykje i Rauland gjennom året.
I fjor måtte alpinsenteret kaste korta etter ein snøfattig vinter, så no står selskapet Raulandsfjell AS bak både hotellet og alpindrifta.
– Eg gjorde dette for å vise at me har tru på staden. Me er ein liten aktør her oppe, men eg har ein stor draum om at anlegget skal bli verande, og at me kan utvide med åra, seier den blide og imøtekomande verten i ein prat med Varden.
Åtte trasear
Alpinbakken hans har åtte trasear den lengste på to kilometer. Det er tre bakkar for ferskingar og barn, tre hovudbakkar og to upreparerte løyper der alpinistane kan boltre seg i laussnøen. Raulandsfjell har ein liten og ein stor heis.
– Mottoet vårt er at bakkane er brattare, tøffare og meir morosame. Løypene i bakken er veldig sikre. Samstundes er anlegget svaert trygt for barna. Her kan dei ikkje køyre seg bort, seier Magnesen.
– Kven kjem hit til bakken? – Nordmenn er hovudgruppa. Dette er folk som likar toppturar, frikøyring og nye greiner av alpin. Mange av kundane kjem frå AustAgder til Oslo og Haugesund. Starten på denne sesongen har vore svaert god. Så me er kjempefornøgd. Anlegget opna 1. joledag og no er det ope kvar dag. Eg ser veldig lyst på trafikken fram til og med påske, svarar eigaren.
Gygra har kurs
Raulandsfjell har samarbeid med Gygra frå Bø, som har både skredkurs, toppturkurs og instruksjon i frikøyring.
Raulandsfjell har 14 leilegheiter og ti rom til utleige.
– Veldig mange familiar kjem hit. Hotellet har drift frå 1. juni til 30. april. Berre mai er dørene stengde. Hotellet er einaste bedrifta i Rauland med eit slikt serveringstilbod gjennom året, så me fyller ut eit tilbod. Maten er heimelaga. Eg vil gje ros til dei fastbuande som er svaert flinke til å besøke restauranten.Me får gode tilbakemeldingar. Folk kjem stadig tilbake, opplyser han.
Fem årsverk
Selskapet sysselset fem årsverk, men har totalt 14 tilsette. Ivar Magnesen har no fått med seg sonen Sebastian i drifta. Han har i fem år studert hotellfag og leiing i Canada.
Raulandsfjell har satsa meir på arrangement dei siste åra - med blant anna konsertar av både E76 og Byting.
– Sistnemnde var her andre joledag. Da var det stappfullt, seier drivarane.
Fleire konsertar
Laurdag 24. februar er det konsert med Rune Sanden. I mars er det afterski og konsert med Kim Eiknes, afterski med Oddbjørn Holla og konsert med The Boots band, for å nemne noko av vinterprogrammet.
Raulandsfjell har i vinter både afterski og quiz kvar laurdag.
I fjor hadde dei oktoberfest med 300 menneske - eit tiltak som også skal vidareførast.
Ifølgje Magnesen har sommartrafikken hatt ein bra auke dei siste åra. Turistane sommarstid er ofte nederlandske eller danske. Dei tek gjerne ei overnatting eller to, seier Ivar Magnesen.