Satsar ti millionar
Langrennsnettet i Rauland blir oppgradert for ti millionar kroner.
Driftsleiar Håvard Bjørkli ved Rauland skisenter seier at prosjektet omfattar strekningen frå Vierli Turistsenter til Rauland sentrum.
Ein del av prosjektet er også skliløypa frå høgfjellshotellet langs fylkesvegen ned til Rauland skisenter.
Spleiselag
Oppgraderinga blir finansiert med tippemidlar til idrettslaget Dyre Vaa. Vinje kommune forskotterer desse. Finansieringa skjer elles ved bidrag frå utbyggingsavtaler med eigedomsutviklarar i området.
– Det skal byggast tre skibruer over elvene som truleg vil koste meir enn ein million kroner for kvar. Generelt vil me også utføre grunnarbeid som resulterer i at tråkkemaskina kan køyre etter snøfall på 10- 15 centimeter. Me ønskjer å gje brukarane eit godt tilbod så tidleg som mogleg om hausten, opplyser Bjørkli.
Positive grunneigarar
Han seier vidare at det alt er utført fundamentering for to av bruene og at heile arbeidet vil bli sluttført i løpet av hausten 2018. Bruene blir laga ved Rukkemo i Ådalen og får ei breidde som medfører at dei store løypemaskinane kjem fint over.
– Eg vil elles understreke at me har eit godt samarbeid med grunneigarane. Dei er svaert positive og stiller areal fritt til rådvelde i desse løypetraseane, seier Håvard Bjørkli.
Løypenettet i bygda blir drive av Rauland Turist. Idrettslaget Dyre Vaa har rettane til løypene der grunneigarane har stilt areal til disposisjon.
Etter det Varden får opplyst, er det aktuelt å sjå på nye område for grunnpreparering. Med tørt underlag er ein ikkje avhengig av tele i bakken.
Håvard Bjørkli seier at dei er på jakt etter meir pengar for å finansiere nye løypeprosjekt.
Dette er prisen
Skiarenaen blir driven av Rauland Skisenter. Kostnadene ved å drive løypenettet utgjer rundt 2,5 millionar kroner per år.
Utgiftene vert delt mellom Vinje kommune, naeringslivet i Rauland samt hytteeigarar og fastbuande som betalar friviljuge bidrag.
Reiselivet gjennomførte i fjor haust ei undersøking, og da gav gjestene løypenettet strålande karakter.