Olav Kasland seier nei til ein ny periode
Bø-ordførar Olav Kasland går ut av lokalpolitikken etter neste val.
– Viss eg skulle teke ein ny periode for Venstre, ville eg fylt 62 år da eg gjekk ut av politikken. Da er det verre å få jobb, seier Olav Kasland til Varden. Han synest det blir vemodig å forlate kommunehuset. Ved utgangen av 2019 har han tolv år bak seg i Bø-politikken, dei siste åtte åra som ordførar.
Det var lokalavisa Bø blad som fyrst omtala at Kasland har sagt nei til nominasjonskomiteen i Venstre.
Ordføraren er svaert godt fornøgd med at ein jobb i politisk avdeling i Forbrukarrådet i Oslo ventar på han. Han skal ha bustad til Bø og pendle til hovudstaden. Bøheringen har tidlegare arbeidd både i Røde Kors og mental Helse.
– Kva er du mest fornøgd med etter desse åra?
– Det er veksten i bygda og den store oppdrifta her. Vidare har kommunen fått kontroll på økonomien og byggjer opp reservar. Elles er eg svaert godt fornøgd med prosessen som førte til at tvillingkommunane Bø og Sauherad går saman. Bø har eit samla politisk miljø. Tilliten mellom dei ulike aktørane er stor, og dette er viktig for å byggje eit godt samfunn, meiner Olav Kasland.
Han har ikkje noko han skammar seg over, men seier at nokre saker kunne vore handtert annleis.
– Dei gløymer eg, seier han. – Det blir verre for Venstre å få ordføraren i Midt-Telemark kommune?
– Dette har ikkje vore ein del av vurderinga mi. Venstre står ikkje svakt i Sauherad heller, avsluttar ordførar Olav Kasland.
▶ Halvor Ulvenes