Buen-slåttar over til klaver
17 hardingfeleslåttar, signert Knut Buen, blir gjeve ut som klavermusikk.
▶ – Det er moro at musikken min når eit større publikum, seier rikskjendisen frå Tuddal. Han viser til at slike prosjekt ikkje er noko nytt. Buen dreg fram Opus 72 av Edvard Grieg som vart til i 1903, indirekte etter initiativ frå Tinn-spelemannen Knut Dahle.
Etter planen skal Musikkforlaget gje ut Buen-heftet med notar i løpet av året, og så skal det spelast inn cd med klavermusikk.
Kan 500 slåttar
Buen har komponert
hardingfeleslåttane over ein periode på kring 40 år. Ved dei nyaste komposisjonane har han tenkt på klaverutgjeving under arbeidet. Buen har totalt komponert mellom 30 og 40 hardingfeleslåttar. Sjølv kan han spele rundt 500 slåttar
Det er Kjetil Bergheim, både organist og hardingfelespelemann frå Gloppen, som bringar musikken vidare til klaver.
– Det byrja med at eg sjølv hadde samla fem-seks slåttar av tradisjonsstoff. Eg snakka med Buen, og han sa at eg gjerne måtte ta tak i hans slåttar. No er det derfor fokus berre på hans musikk, fortel Kjetil Bergheim, til dagleg laerar på kulturskulen i Asker.
Stor beundrar
Håvard Gimse, professor ved Noregs musikkhøgskole og ein av landets fremste utøvarar på klaver, seier at han er ein stor beundrar av alt Knut Buen står for. Gimse har sjølv spela Buenslåtten «Vandraren», tileigna friluftsmennesket dronning Sonja. Gimse skal òg vere med å spele inn slåttane på cd, truleg i januar 2019. Med seg har han både noverande og tidlegare studentar som han karakteriserer som framifrå pianistar.
Fint tilskot
– Dei kjem frå seks-sju ulike land, og vil gjere Buen-slåttane internasjonale. Denne musikken er eit fint tilskot til pianorepertoaret, seier Håvard Gimse.
Forlagssjef Helge Westbye i forlaget Grappa føler seg sikker på at cd-utgjevinga blir realisert.
– Dette er eit spørsmål om tid. Går det bra, kan den kome ut hausten 2019. Alt med Knut Buen er artig, avsluttar Helge Westbye. Halvor Ulvenes ▶